Nagpahayag hin pagtipa ngan kabaraka an magkalain-lain nga grupo kontra ha proposisyon ha Kongreso han US nga magtindog han pabrika han bala ha Subic Bay, Zambales. Sering nira, hulga ini nga plano ha nasyunal nga seguridad ngan makakaapekto ha pakabuhi han mga parupangisda ha Zambales.

Linutaw an plano nga pagtindog han pabrika ha usa nga report han US House Committee on Appropriations nga iginsapublikar hadton Hunyo 24.

“Ha kasaysayan, diri an katunaan han US an nagigin direkta nga target han mga kasumpaki hini nga nasud, kundi an mga base militar ngan mga satelayt nga base hini ha iba nga lugar,” sering han Pamalakaya.

Ginsukna naman han Kilusang Magbubukid ng Pilipinas (KMP) an iginlansar han US nga Operation Lightning Strike war games hadton Hunyo 30 ha Palayan City, Nueva Ecija ilarum han Salaknib Phase 2. Ginpabuto hini nga war games an duha nga High Mobility Artillery Rocket System (HIMARS) ngan gumamit hin upat nga Apache attack helicopter.

Sering han grupo, peligroso ini nga mga war games ha mga komunidad han parag-uma, labina an live-fire missile test. Natuod an KMP nga diri ini para ha depensa o kamurayawan kundi kaparte han pangandam han US para ha gerra.

Samtang, nagmartsa ha Sydney ha Australia an mga Pilipino ngan Australian hadton Hunyo 22 komo pagsukna ha iginlansar nga Pilipinas-Australia Kasangga war games. Duha kabeses kada tuig nga iginlansar tikang 2023 an Kasangga diin libre nga nakakasulod an mga tropa nga Australian ha teritoryo han Pilipinas.