Nagpahayag sang pagpamatuk kag kahangawa ang lain-lain nga grupo batuk sa hagna sang Kongreso sang US nga magtukod sang pabrika sang bala sa Subic Bay, Zambales. Siling nila, peligro ang plano nga ini sa pungsodnon nga seguridad kag maka-apekto sa palangabuhian sang mga mangingisda sa Zambales.

Nagtuhaw ang plano nga pagtukod sang pabrika sa isa ka report sang US House Committee on Appropriations nga ginsapubliko sadtong Hunyo 24.

“Sa kasaysayan, indi ang kadutaan sang US ang nangin direkta nga target sang mga kasumpong sini nga pungsod, kundi ang mga base militar kag mga satelayt nga base sini sa iban nga lugar,” siling sang Pamalakaya.

Ginbatikos naman sang Kilusang Magbubukid ng Pilipinas ang ginlunsar sang US nga Operation Lightning Strike war games sadtong Hunyo 30 sa Palayan City, Nueva Ecija sa idalum sang Salaknib Phase 2. Ginpalupok sa war games nga ini ang duha ka High Mobility Artillery Rocket System kag naggamit sang apat ka Apache attack helicopter.

Siling sang grupo, peligroso ang mga war games nga ini sa mga komunidad sang mangunguma, ilabi na ang live-fire missile test. Nagapati ang KMP nga indi ini para sa depensa ukon kalinong kundi kabahin sang paghanda sang US para sa gyera.

Samtang, nagmartsa sa Sydney sa Australia ang mga Pilipino kag Australian sadtong Hunyo 22 bilang pagbatikos sa ginlunsar nga Pilipinas-Australia Kasangga war games. Duha ka beses kada tuig nga ginalunsar sumugod 2023 ang Kasangga kon diin hilway nga makasulod ang mga tropang Australian sa teritoryo sang Pilipinas.