Sunud-sunod nga petisyon ang gisumite sa kampo ni kanhing presidente Rodrigo Duterte aron langanon ang pagdungog sa iyang kasong krimen batok sa katawhan sa Pre-Trial Chamber 1 sa International Criminal Court (ICC). Pinakabag-o dinhi ang petisyon alang sa “hinanaling status conference” nga gipasaka niadtong Hunyo 17 aron kwestyunon ang iskedyul sa pag-atubang ni Duterte sa korte sa Setyembre 23. Gigamit pa niining hinungdan ang mga “delay” o pagkalangan kuno sa mga pagpangandam sa prosekusyon.

Ayha niini, gibasura na sa korte ang uban pang mga “delaying tactic” sa mga abugado ni Duterte. Usa dinhi ang petisyon aron idiskwalipika ang duha ka huwes nga naggunit sa iyang kaso. Niadtong Hulyo 3, gibalibaran sa plenaryo sa ICC ang ilang hangyo nga tangtangon silang Judge María del Socorro Flores Liera ug Judge Reine Adélaïde Sophie Alapini-Gansou gikan sa Pre-Trial Chamber I.

Matud sa ICC, walay basehan ang alegasyon sa kampo ni Duterte nga adunay gidapigan ang mga huwes tungod sa nauna nilang kalambigitan sa desisyon kalabot sa isyu sa hurisdiksyon sa korte sa kaso. Gitin-aw sa ICC nga kabahin sa trabaho sa mga huwes ang subling paghisgot sa mga ligal nga isyu samtang nagalarga ang kaso, ug wala kini nagpasabot sa pagdapig o bias.

Duha pa ka petisyon nga pagpalangan sa proseso ang gisang-at sa mga abugado ni Duterte. Ang una mao ang hurisdiksyon sa korte kang Duterte tungod kay dili na myembro sa ICC ang Pilipinas ug ang ika-duha mao ang pagpangayo og interim release o temporaryong pagbuhi. Wala pay desisyon ang korte sa parehong petisyon. Sa kaso sa interim release, hugot kining gibabagan sa mga biktima, ug sa ilang mga abugado, ug bisan sa prosekusyon sa ICC.

Samtang, padayon ang paglarga sa kaso sa korte. Niadtong Hulyo 1, nagsumite ang prosekusyon sa ika-11 nga bungkos sa ebidensya batok sa kanhing presidente, lakip ang kapin 1,000 ka dokumento nga naglangkub sa mga pagpatay gikan sa panahon niya isip meyor sa Davao City hangtud sa iyang termino isip presidente.