Sa una niyang State of the Nation Address, gisulti ni Marcos nga ang renewable energy (RE) pagatagdon sa iyang gubyerno isip yaweng sektor aron kuno sa pagpalambo sa ekonomiya sa nasud. Gikan kaniadto, nahimong agresibo ug dayag ang pagpangilog og yuta ug pagguba sa kinaiyahan aron hatagag dalan ang mga tigpamuhunan sa RE sa nasud. Mokabat sa 68% sa langyawng pamuhunan niadtong 2024 gikan sa mga proyektong RE.

Ilalum sa National Renewable Energy Program (NREP), ang gitarget nga 50% sa enerhiya sa Pilipinas pagka-2040 maggikan sa RE. Gitukod kini sa tinguhang aduna kunoy “sustenableng tinubdan” sa enerhiya. Ang RE naglangkub sa enerhiyang biomass (dunot nga organikong materyal), solar (adlaw), wind (hangin), geothermal (init nga sungaw gikan sa yuta) ug hydropower (tubig).

Labaw nga gidalian ug gipaspasan ni Marcos ang paghatag og permit ug lisensya sa mga langyawng kapitalistang tigpamuhunan sa RE. Niadtong Abril, naghatag ang Department of Energy og permit alang sa 1,319 nga proyektong RE, 39% o 517 dinhi mga proyektong solar. Ang Ilocos ang ika-upat sa adunay pinakadaghang proyektong solar, nga adunay 53 proyekto. Target usab sa estado nga adunay 46,000 ektaryang solar farms pagka-2040.

Paspas usab nga gidawat sa mga lokal nga dagkung burgesyang kumprador ang mga proyektong RE sa nasud aron pahimuslan kini. Lakip dinhi ang Solar Philippines New Energy Corp. (SPNEC) ni Manny Pangilinan, AC Energy Corp. (ACEN) sa mga Ayala, APC Group Inc./Philippine Geothermal Production Co. sa pamilyang Sy, Astra Solar Energy Corp. sa kumpanyang Aboitiz, San Miguel Global Power Holdings ni Ramon Ang ug Energy Development Corporation (EDC) sa Lopez Group.

Usa sa labing magun-ubong proyektong RE mao ang 3,500 ektaryang solar farm (mas daku pa sa tibuok Makati City ug Mandaluyong) nga gipanag-iyahan sa Meralco Terra Solar sa parte sa Bulacan ug Nueva Ecija. Kini mamahimong pinakadaku nga solar ug battery facility sa tibuok kalibutan. Gipanag-iyahan kini sa SPNEC ug Actis, kumpanyang nakabase sa United Kingdom (UK).

Pagalangkubon usab sa Laguna Lake Floating Solar Project ang 2,000 ektarya sa danaw sa bahin sa Calamba, Santa Rosa, Cabuyao, Bay ug Victoria. Gipanag-iyahan kini sa ACEN ug mga kumpanya gian Singapore ug UK.

Lakip sa pinakadakung offshore ug onshore windfarm pagatukuron sa San Miguel Bay, Camarines Sur, nga molangkob sa 23,307 ektaryang katubigang pangmunisipyo sa San Miguel. Kini adunay kapasidad nga 1,000 megawatts (MW) ug iya sa Copenhagen Infrastructure New Market Fund Corp., kumpanyang gikan Denmark ug ACEN nga adunay 25% nga sosyo. Pagatukuron usab ang 1,200 MW Guimaras Strait OSWF sa tunga-tunga sa Panay ug Negros nga iya sa mga kumpanya gikan Switzerland ug Liechtenstein. Pagatukuron usab sa ACEN ang 2,510 MW Quezon North Wind Farm sa Real, Quezon ug ang 625 ektaryang North Luzon Renewable Wind Farm sa Pagupud, Ilocos Norte.

Mokabat sa 99 ka proyektong hydropower, nga adunay kinatibuk-ang 4,000 MW, ang giaprubahan sa gubyerno sa Cordillera. Upat dinhi ang iya sa kumpanya gikan Australia. Nakatakda usab nga magtukod og tulo ka geothermal power plant (GPP) sa rehiyon nga magmugna og kinatibuk-ang 300 MW nga kuryente. Kini ang Buguias-Tinoc GPP nga iya sa EDC, ug Kalinga GPP ug ang Mainit-Sadanga GPP nga parehong iya sa APC.

Rason sa reaksyunaryong estado ang “pag-atubang sa krisis sa klima” aron ilusot ang binilyong kantidad sa proyektong RE. Apan ang tinuod, gipahuyang ang kapasidad sa nasud nga atubangon ang mga unos sa pag-usab sa klima sa walay puas nga pagguba sa kinaiyahan aron hatagag dalan ang maong mga pasilidad.

Mas grabe, libu-libong mag-uuma, mangingisda ug lumad ang mangawad-ag panginabuhian ug puluy-anan ug libu-libong ektaryang yutang agrikultural, kadagatan ug kalasangan ang gub-on sa ngalan sa limpyung enerhiya nga monopolisado sa langyaw ug lokal nga burgesyang kumprador.