Sa milabayng duha ka tuig, subsub ang pagpalapad sa US sa presensyang militar ug pagtukod og mga estratehikong imprastrukturang militar niini sa Pilipinas. Niadtong 2024, gipwesto niini ang Typhon Missile Sytem sa amihanang Luzon. Gisundan kini karong tuiga sa pagsulod sa NMESIS, MADIS ug uban pang mga himang iggugubat.

Niining tuiga usab, giangkon sa US ang pasilidad nabal sa Oyster Bay sa Palawan, gimando ang pagtukod sa pabrika sa bala sa Subic ug gipagawas ang inisyal nga pondo alang sa konstruksyon sa Subic-Clark-Manila-Batangas Railway. (Lantawa ang kalambigit nga artikulo sa AB, Hulyo 7, 2025.) Kabahin kining tanan sa pag-andam sa US sa nasud isip usa ka dakung forward operating base sa ginahulhog niining imperyalistang gubat batok sa China.

Tin-aw nga sobra-sobra na sa siyam nga “nahiusahang EDCA site” (Enhanced Defense Cooperation Agreement) ang giangkon ug gigamit sa US nga mga base sa Pilipinas. Sa takuban sa walay puas nga mga war games, gipaspasan sa US ang konstruksyon sa mga baraks, bodega ug iba pang imprastruktura sulod sa mga kampo sa Armed Forces of the Philippines (AFP) aron mahimong iakumudar ang nagkadaghang mga tropa, gamit ug sakyanang Amerikano nga tibuok tuig nga gibutang sulod ug palibot sa nasud.

Niadtong Hunyo, giaprubahan sa Kongreso sa US ang $1-$5 bilyong pondo alang sa “upgrade” sa dungguanang nabal sa AFP sa Oyster Bay. Ginagamit na sa US ang dungguanan alang sa mga “freedom of navigation operation” ug “joint patrol” sa South China Sea, kauban ang Australia ug Japan. Gikan pa 2020 gitransporma sa US ang malinawong komunidad sa mga mangingisda dinhi ngadto sa usa ka yaweng pasilidad alang sa mga barko ug drone pangdagat nga ginagamit niini aron hagiton ang mga barkong Chinese ug pagrabehon ang tensyon sa South China Sea. Ginalusot sa AFP ug US ang mga patrulya isip “pagpanalipud sa mga mangingisdang Pilipino,” apan sa aktwal, ang US ug higanteng mga barko niini ang naghikaw sa ilang panginabuhian sa Oyster Bay ug kasikbit na kadagatan.

Kadungan niini, nabalita niining Hulyo ang pagtuod sa US og usa pa ka baseng nabal sa kadagatan sa Palawan, atubangan sa munisipalidad sa Quezon. Matud sa mga taho, napili ang lokasyon tungod sa kaduul niini sa Second Thomas Shoal, usa sa hinungdan sa kagubot sa dagat tali sa Pilipinas ug China. Ibutang dinhi ang mga “inflatable boat” nga ginagamit sa pag-atake ug pangdugang sa ginagamit na sa militar sa Pilipinas sa pakiglantugi niini sa mga barko sa China. Target sa US nga paganahon ang base sa unang kwarto sa 2026.

Niining tuiga usab, gisugdan na sa US ang plano niining gamiton ang Pilipinas isip dakung han-okanan og himang iggugubat. Subay kini sa 2025 Joint Vision Statement on Defense Industrial Cooperation nga gipirmahan sa rehimeng Marcos ug gubyerno ni Donald Trump niadtong Marso. Pamaagi kini sa US aron masiguro ang pinaspas ug walay putol nga suplay sa gamit iggugubat panahon nga moulbo ang inter-imperyalistang gubat.

Sa takuban sa “kolaborasyon” ug “pagpalambo sa kapasidad sa depensa sa AFP,” pagatukuron sa US sa lain-laing dapit sa nasud ang mga pabrika niini sa bala, unmanned systems (drone), pasilidad aron magproseso og mga “kritikal nga mineral” nga ginagamit sa mga bomba, ug “additive manufacturing” sama sa 3D printing.

Niadtong Mayo, gipwesto na sa US sa Fort Magsaysay sa Tarlac ang usa ka 3D printer nga adunay kapasidad nga maghimo og gagmayng drone (gitawag nga first-person view o FPV drone) nga haum sa tereyn ug klima sa Pilipinas. Gigamit ang maong mga drone sa gilunsad nga Salaknib Exercises Phase 2 aron “bahaon og mata” ang kalasangan ug mga baryo sa Northern Luzon. Kalabot sa maong aktibidad ang 7th ID ug 5th ID sa AFP. Ayha pa niini, giabli na sa AFP ug rehimeng Marcos ang Aurora alang sa pagmanupaktura sa US og mga drone niadtong 2024.

Ang mga pabrika, makina ug gamit iggugubat nga ibutang sa Pilipinas direktang padaganon sa militar ug mga gaway sa mga kapitalista sa industriyang militar sa US.