Siguradong ipanghinambog ni Marcos sa iyang ika-upat nga State of the Nation Address ang programa sa “kalinaw ug kalamboan” nga ginapasiugdahan sa iyang rehimen. Iya kining gamiton nga okasyon para palakpakan ang iyang mga pasistang gaway ug alipures sa “pagpakgang sa armadong panagbangi.” Dungan niini, iyang tabunan ang grabeng pagpangabuso sa gahum ug paglapas sa mga demokratikong katungod, sa kasyudaran ug ilabina sa kabanikanhan.

Mini ug haw-ang ang “kalinaw ug kalamboan” sa “National Action Plan for Unity, Peace and Development” ni Marcos. Usa kini ka malinglahong islogan aron tabunan ang kamatuoran sa kaylap nga kalisud, kagutom ug pag-antus sa milyun-milyong mag-uuma ug mamumuo ug mga walay panginabuhian. Laraw niining ipadawat sa katawhan nga kapalaran na nila ang mag-antus sa pagpangdaugdaug ug pagpahimulos aron idiskaril ang ilang diwa ug kusog nga manalipud ug mosukol, ug payukbuon sila sa gahum sa teroristang estado.

Sa takuban sa “kalinaw,” ginagamit ni Marcos ang mga armadong pwersa sa estado sa pagpahamtang og balaod militar sa kabanikanhan aron sumpuon ang pagsukol sa masang mag-uuma. Tumong niining subaybayan ang matag lihok sa mga tagabaryo, kontrolon ang suplay sa pagkaon ug komersyo, bisan ang oras sa pagtrabaho sa umahan sa mga mag-uuma. Giobliga ang tanan nga magpa-“clear” sa ilang pangalan ug “makigtinabangay” sa mga upisyal militar. Walay hunong ang pagpanghasol sa iladong mga lider ug aktibo sa mga kahugpungan sa mag-uuma. Daghan ang mga kaso sa pagpatay, pagdakop ug iligal na pagpriso, tortyur ug mga masaker, pagpanganyon ug pagpanghulog og bomba duul sa mga komunidad.

Aron hadlukon ang tagabaryo, ginakampuhan sa mga panon sa mga sundalo ang mga baryo, ug ginagamit nga baraks ang mga eskwelahan o barangay health center. Gitugaw nila ang kahilum sa baryo pinaagi sa paghuboghubog, sugal, paggamit sa ginadiling droga ug paturagas nga pagpabuto og pusil. Sa ngalan sa “depensa sa teritoryo,” pugos nga ginarekrut sa mga sundalo ang mga mag-uuma sa paramilitar nga grupong CAFGU ug Barangay Intelligence Network aron gamiton sila batok sa ilang mga silingan.

Sa ngalan sa “pag-ases sa kapasidad” sa mga komunidad sa kasyudaran, ginagamit ni Marcos ang iyang mga armadong pwersa aron sumpuon ang katungod sa mga mamumuo, semi-proletaryo, kabatan-onang estudyante ug uban pang sektor sa kasyudaran. Ginatiktikan ug ginahasi ang mga unyonista ug mga aktibista sa eskwelahan ug mga komunidad aron pahunungon sa ilang pag-organisa ug pagtabang sa ilang kapwa. Sama sa kabanikanhan, gigamit nga taktika ang pagpamig-ot ug walay hunong nga pagpanghulga sa ilang mga pamilya aron pugson silang mosunod sa kung unsay gusto sa militar ug pulis.

Engrandeng pagpanglingla sa masang mag-uuma ang gipanghinambog ni Marcos nga “pag-apud-apud sa titulo” tungod kay kadaghanan niini kanhi na nilang gunit na kolektibong titulo (Certificate of Land Ownership Award) ilalum sa “agrarian reform communities,” lakip na ang mga yutang kanhi nang nahatag sa rebolusyonaryong kalihukan sa mga mag-uuma ug lumad, nga gibahin-bahin aron dali rang paliton o ilugon sa dagkung mangingilog og yuta.

Lapad nga lupain ang ginasubasta ni Marcos sa mga langyawng dagkung kapitalista sa porma sa pagpa-“abang” og hangtud 99 ka tuig. Gatusan ka libong mag-uuma ug mga lumad ang ginapalayas aron hatagag dalan ang mga plantasyon, minahan, mga proyektong pang-enerhiya, turismo ug uban pang operasyon sa dagkung kumpanyang langyaw ug lokal. Ginatanyagan sila ni Marcos nga mamuhunan nga wala o halos walay pagabayarang buhis. Siguradong mas bug-at pa nga mga anti-katawhan ug anti-nasyunal nga palisiya ang imando ni President Trump sa US sa papet nga si Marcos sa panagtagbo nila sa White House.

Kaugalingon lamang ang ginailad nilang Marcos, sa iyang mga upisyal militar ug alipures sa NTF-Elcac sa pagpanghinambog nga hapit na nilang mapuo ang Bagong Hukbong Bayan. Usa na lang kuno ang natarang gerilya sa tibuok nasud, pero mayorya pa gihapon sa mga batalyong pangkombat AFP ang nakadeploy batok sa BHB.

Ginagamit ni Marcos ang pipila ka nagtraydor sa masa aron dayegon ang iyang “kalinaw ug kalamboan.” Sila mga reaksyunaryong espesyal nga ahente para mangulihad og disimpormasyon ug bakak batok sa rebolusyonaryong kalihukan.

Ang “kalinaw” ni Marcos kahilum sa lubnganan sa mga biktima sa iyang pasistang paghari. Gisaulog sa imperyalismong US ug mga lokal nga nagharing hut-ong ang kalinaw nga gipanghinambog ni Marcos aron gawasnon nilang kawkawon ang yuta sa masang mag-uuma, gun-ubon ang mga bukid ug suba, sakmiton ang bahandi sa nasud, kurakuton ang nasudnong bahandi ug tukuron sa nasud ang gahum sa pwersang militar sa US.

Ang maong mini nga “kalinaw” ni Marcos ug sa iyang NTF-Elcac ug AFP usa ka dakung babag sa pakighisgot kalinaw sa NDFP. Babag usab ang padayon nga pagpamig-ot, pagpriso ug pagpatay sa mga konsultant ug representante sa NDFP, sukwahi sa kanhing mga kasabutan. Dili makab-ot ang makatarunganon, malingkawasnon ug malahutayong kalinaw hangtud dili atubangon ug sulbaron ang batakang problema nga maoy ugat sa armadong panagbangi sa nasud, ug kung ang bugtong tumong mao ang pukanon, sumpuon ug pasurenderon ang tanang nagasukol.

Kinahanglang isalikway sa katawhang Pilipino ang mini ug haw-ang nga kalinaw ni Marcos. Atubangan sa nagkagrabeng pagpanumpo, nagkagrabeng porma sa pagpangdaugdaug ug pagpahimulos, ug paggrabe sa krisis sa dunot nga sistemang semikolonyal ug semipyudal, walay laing kapilian ang katawhang Pilipino kundili ang dalan sa pagsukol, ilabina ang dalan sa armadong pakigbisog. Ang armadong pakigbisog ang pinakakusog nga armas sa katawhan aron panalipdan ang ilang katungod, kinabuhi ug panginabuhian. Kung walay armadong pakigbisog ang katawhan, walay hunong nga magdomina ang imperyalismong US ug mga nagharing hut-ong sa pagpangdaugdaug ug pagpahimulos sa katawhan.

Taliwala sa nasinati nga mga kadaut tungod sa kaugalingong mga kahuyangan ug atubangan sa todong atake sa AFP, determinado ang Bagong Hukbong Bayan nga moangot sa dalan sa armadong pakigbisog, tul-iron ang kanhing mga kahuyangan ug pakusgon ang rebolusyonaryong pagsukol. Sa pagpangulo sa Partido, padayon nga molapad ug mokusog ang BHB ug baseng masa niini sa tibuok nasud. Nagpabiling tabunok ang yuta aron moasdang ang armadong pakigbisog ug subling pakusgon ang mga natarang gerilya aron magsilbing kota sa pakigbisog sa katawhan alang sa nasudnon ug katilingbanong paglingkawas.