Niining Agosto, gideklara sa Zionistang estado sa Israel ang plano nga direktang sakupon ang tibuok Gaza Strip, human ang halos duha ka tuig niining pagpamomba sa usa ka brutal nga henosidyo batok sa mga Palestino. Giaprubahan ang plano sa tigum sa gabinete ni Benjamin Netanyahu niadtong Agosto 7-8. Pipila ka semana ayha niini, nanawagan usab ang parlamento sa Israel nga sakupon ang tibuok West Bank.

Ang maong mga lakang lain na usab nga ang-ang sa paggrabe sa henosidyo sa US-Israel nga adunay tinguha nga paphaon ang katawhang Palestino.

Ginaduso ni Netanyahu ang pag-okupa sa Israel sa Gaza taliwala sa nagkagrabeng kasuko sa katawhang Israeli batok sa iyang gubyerno, tungod sa kapakyasan nga mabawi ang mga bihag sa Palestinong grupong Hamas, ug tungod sa brutalidad batok sa mga Palestino. Sunud-sunod ang dagkung protesta, samtang nagkadaghan ang mga kabatan-onang Israeli nga nagbalibad nga mosulod sa militar isip protesta sa ginahimo niining henosidyo.

Gikasilagan na pag-ayo sa daghang nasud ug katawhan ang Zionistang rehimen. Sukad nga gipasubsub niini ang kampanyang henosidyo, walay puas ang mga protesta ug aksyon sa minilyong katawhan sa tibuok kalibutan nga nagabarog alang sa pagpalingkawas sa Palestine.

Halos 90% na sa teritoryo sa Gaza ang kontrolado sa mga pwersa sa Israel. Ang Gaza City ug mga refugee camp sa sentro sa Gaza na lamang ang nahabilin. Nagdasok ang duha ka milyong Palestino sa maong mga lugar kung asa nakahiagum sila sa inadlaw-adlaw nga pagpamomba ug pag-atake, grabeng kagutom ug kapit-os.

Subay sa plano, hangtud Oktubre 7, sa adlaw sa ikaduhang tuig sukad nga gisugdan sa Israel ang mga atake, ang gihatag sa mga Palestino para mohawa sa Gaza City, ang pinakadakung syudad sulod sa engklabo. Human niini, magalunsad og malukpanong atake ang Zionistang militar sa syudad ug sa ubang dapit nga wala pa nasakop sa Gaza. Laraw kuno niini nga tapuson ang Hamas, pagtapos sa gubat ug “paghatud og ayuda” sa mga sibilyan.

Gitawag sa mga grupong Pilipino ang maong plano nga “labing linuog.” Gikundena usab sa mga grupo sa lain-laing nasud, internasyunal nga mga institusyon ug mga katawhan ang maong plano.

Sukad niadtong Marso, absolutong gibawal sa Israel ang paghatud ug pagpanghatag og ayuda. Bugtong ang giitawag nga “Gaza Humanitarian Foundation (GHF),” nga gipadagan pareho sa mga pwersang militar sa US ug Israel, ang gitugutan niining manghatag og pagkaon. Dili moubos sa 859 ka Palestino ang tinuyong gipatay sa mga sundalong Israeli samtang naglinya sa mga distribution site sa GHF. Dugang sila sa mga napatay samtang naglumba sa labing gamay nga ayudang pagkaon.

Walay kasangkuan ang kagutom sa Gaza. Mikabat na sa 210 Palestino, sagad mga bata, ang namatay tungod sa gutom. Niadtong Hulyo lamang, 74 ang namatay tungod sa malnutrisyon, daghan gilaygay na, lakip ang mga bata nga wala pay 5 anyos. Dugang sila sa kapin 60,000 nga direktang gipatay ug 150,000 ang nasamdan sa pagpamomba ug pag-atake sa Israel sa 22-ka-bulang henosidyo. Gikundena sa labing daghang nasud ang paggamit sa US ug Israel sa pagkaon isip armas sa pagsumpo sa maisugong diwa sa mga Palestino.

Wala pa gihapoy hunong ang pagpamomba ug pag-atake sa Israel sa Gaza Strip. Niadtong Agosto 10, napatay sa pagpamomba sa US-Israel ang tigbalita nga si Anas al-Sharif, uban ang usa pa ka korespondent sa Al Jazeera nga si Mohammed Qreiqeh ug ang ilang mga camera operator nga sila Ibrahim Zaher, Mohammed Noufal ug Moamen Aliwa.

Dakung kalapasan kini sa internasyunal nga makitawhanong balaod kung asa ginaila nga protektadong mga indibidwal ang mga midya taliwala sa armadong kaguliyang. Sukad 2023, kapin 200 ka midya na ang tinuyong gipatay sa US-Israel sa Gaza.