Sining Agosto, gin-deklarar sang Zionistang estado sang Israel ang plano nga direkta na nga sakupon ang bug-os nga Gaza Strip, pagkatapos ang halos duha ka tuig sini nga pagpangbomba sa isa ka brutal nga henosidyo batuk sa mga Palestino. Ginpalig-on ang plano sa sinapol sang gabinete ni Benjamin Netanyahu sadtong Agosto 7-8. Pila ka semana antes sini, nagpanawagan man ang parlyamento sang Israel nga sakupon ang bug-os nga West Bank.

Ang mga tikang nga ini panibag-o nga lebel sang pagsingki sang henosidyo sang US-Israel nga may katuyuan nga papason ang pumuluyong Palestino.

Ginaduso ni Netanyahu ang pagsakop sang Isarel sa Gaza sa tunga sang nagasingki nga kaakig sang pumuluyong Israel batuk sa iya gobyerno, tungod sa kapaslawan nga mabawi ang mga bihag sa Palestino nga grupo nga Hamas, kag tungod sa brutalidad batuk sa mga Palestino. Asod-asod ang mga dalagko nga protesta, samtang nagadamo ang mga pamatan-on nga Israel ang nagapamalibad nga magsulod sa militar bilang protesta sa ginahimo sini nga henosidyo.

Grabe na ang pagkangil-ad sang tuman ka damo nga pungsod kag pumuluyo sa Zionista nga rehimen. Halin sang pasingkion sini ang kampanya nga Henosidyo, wala-puas ang mga hublag kag aksyon sang minilyon ka pumuluyo sa bug-os nga kalibutan nga nagatindog para sa kahilwayan sang Palestine.

Halos 90% sang teritoryo sang Gaza ang kontrolado na sang mga pwersa sang Israel. Ang nabilin na lang amo ang Gaza City kag mga refugee camp sa tunga sang Gaza. Nagaginutok ang duha ka milyon ka Palestino sa mga lugar nga ini kon diin nagaantus sila sang adlaw-adlaw nga pagpangbomba kag pagpangsalakay, grabe nga gutom kag kaimolon.

Sandig sa plano, hatagan ang mga Palestino sang tubtob Oktobre 7, sa adlaw sang ikaduha ka tuig halin sang sugdan sang Israel ang mga atake, para maghalin sa Gaza City, ang pinakadako nga syudad sa sulod sang engklabo. Sunod sini magalunsar sang lapnagon nga atake ang Zionistang militar sa syudad kag iban pa nga wala nasakop nga bahin sang bug-os nga Gaza. Ang plano para kuno wasakon ang Hamas, pagtapos sa gyera kag “pagdul-ong sang makatawo nga ayuda” sa mga sibilyan.

Gintawag sang mga grupo nga Pilipino ang plano nga ini nga “makangilidlis.” Ginpakamalaut man sang mga grupo sa lain-lain nga pungsod,internasyunal nga mga institusyon kag mga pumuluyo ang amo nga plano.

Halin pa Marso, absoluto nga ginadumilian sang Israel ang pagdul-ong kag pagpanghatag sang ayuda. Solo ang ginatawag nga “Gaza Humanitarian Foundation (GHF),” nga magkabulig nga ginapadalagan sang mga pwersang militar sang US kag Israel, ang ginpasugtan sini nga magpanghatag sang pagkaon. Indi magnubo sa 859 ka Palestino ang hungod nga ginpatay sang mga soldado nga Israeli samtang nagapila sa mga distribution site sang GHF. Dugang sila sa mga napatay samtang nagapaunahay sa tuman ka kulang nga pagkaon nga ayuda.

Naglab-ot na sa wala sang tupong ang gutom sa Gaza. Naglab-ot sa 210 ka Palestino, kadam-an mga bata, ang napatay tungod sa gutom. Sadtong Hulyo lang, 74 ang napatay tungod sa malnutrisyon, madamo ang indi na makabangon, lakip ang mga bata nga wala pa lima ka tuig ang pang-edaron. Dugang sila sa masobra 60,000 nga direkta nga ginpatay kag 150,000 ang napilasan sa pagpangbomba kag pagpang-atake sang Israel sa 22-bulan nga henosidyo. Ginkundenar sang tuman ka damo nga pungsod ang paggamit sang US kag Israel sang pagkaon bilang armas sa pagsumpo sa mapang-away nga espirito sang mga Palestino.

Wala pa gihapon sang untat ang pagpangbomba kag pagpang-atake sang Israel sa Gaza Strip. Sadtong Agosto 10, napatay sa pagpangbomba sang US-Israel ang mamalitha nga si Anas al-Sharif, kaupod ang isa pa ka korespondent sang Al Jazeera nga si Mohammed Qreiqeh kag ang ila mga camera operator nga sanday Ibrahim Zaher, Mohammed Noufal kag Moamen Aliwa.

Tuman nga paglapas ini sa idalum sang internasyunal nga makatawo nga layi kon diin ginakabig nga protektado nga mga indibidwal ang mga mamalitha sa tunga sang armadong kagamo. Halin 2023, lapaw na sa 200 ka mamalitha ang hungod nga ginpatay sang US-Israel sa Gaza.