Magkabulag nga mga protesta ang gilunsad sa mga grupong Moro ug Pilipino aron hugot nga kundenahon ang paggrabe sa henosidyo sa US-Israel sa Gaza niining milabayng mga semana ug ipanawagan ang hinanaling paghunong sa mga atake, iduso ang pagpasulod sa ayuda ug kagawasan alang sa mga Palestino.

Niadtong Agosto 15, mikabat sa 1,300 ka Moro sa Marawi City ang nagtapok alang sa usa ka “malinawong pakighiusa ug demonstrasyong masa para sa Gaza.” Nagmartsa sila gikan Masjed Bato padulong sa Sarimanok Stadium sa Ground Zero sa syudad, ang lugar nga gipulbos sa grabeng pagpamomba sa rehimeng Duterte ug Armed Forces of the Philippines (AFP) niadtong 2017. Gihulagway nila ang pagguba sa AFP sa ilang syudad sa ginahimong pagpamomba karon sa pwersang US-Israel sa Gaza. Ayha niini, naglunsad og “walk for peace” sa syudad niadtong Agosto 9.

Niadtong Agosto 9 usab, nagpahigayon og indignation rally ang Bagong Alyansang Makabayan (Bayan), Moro-Christian Peoples Alliance ug Philippine-Palestine Friendship Association sa Quezon City aron kundenahon ang pag-apruba sa gabinete sa Israel sa desisyon aron hingpit nang sakupon sa militar niini ang Gaza.

Niadtong Agosto 13, nagprotesta usab ang mga tigbalita, grupong kabatan-onan ug midya sulod sa University of the Philippines sa Diliman, Quezon City aron kundenahon ang lain na usab nga kaso sa pagpamatay sa US-Israel sa tigbalita sa Palestine.