Daku kaayong tamparus sa rehimeng US-Marcos ug sa mga upisyal sa Armed Forces of the Philippines (AFP) ang sunod-sunod nga armadong aksyon sa Bagong Hukbong Bayan (BHB) sa pipila ka mga prubinsya sa nasud. Gisundan kini sa pamahayag sa rehimen nga “wala nay grupong gerilya” niadtong Hulyo sa ika-4 nga SONA.

Niadtong Agosto 12, tulo ka sundalo lakip na ang usa ka kapitan sa 1st Scout Ranger Regiment ubos sa 203rd IBde ang napatay sa ikaduhang engkwentro niadtong adlawa tali sa BHB-Mindoro (Lucio de Guzman Command) ug militar sa Barangay Lantuyang 2, Baco, Oriental Mindoro. Naigo sa ulo ug dihadihang namatay ang lider sa yunit nga si Capt. Marky John Alberto. Tulo pa ka pasistang sundalo ang nasamdan.

Pipila ka adlaw ayha niini, usa ka sundalo sa 203rd IBde ang napatay sa BHB-Mindoro samtang aktibong nagdepensa batok sa miatakeng yunit sa kaaway sa Barangay Mangangan 2 sa Baco niadtong Agosto 9 sa buntag.

Sa Quezon, girakrakan sa usa ka yunit sa BHB-Quezon (Apolonio Mendoza Command) ang bag-ong tukod nga kampo sa militar sa 85th IB sa Barangay Cogorin Ibaba, Lopez niadtong Agosto 2. Gisugdan ang pagharas sa alas 7:30 sa gabii.

Gikalipay sa katawhan sa Quezon ang pag-atake tungod kay gusto nilang manubag ang berdugong batalyon sa mga krimen ug hatagan og hustisya ang ilang mga biktimang mag-uuma.

Sa Capiz, gipakyas ang pag-atake sa 12th IB batok sa usa ka yunit sa BHB-Central Panay (Jose Percival Estocada Jr Command) sa utlanan sa Barangay Artuz ug Barangay Apero sa lungsod sa Tapaz niadtong Hulyo 19. Aktibo nga nakaprotektar ang hukbong bayan batok sa tropa sa militar pinaagi sa paspas nga pagpangandam ug paglunsad og kontra-atake.

“Sa kakurat sa militar, daw mga irong buang silang paturagas nga namusil,” matud sa BHB-Central Panay. Aron tabunan ang ilang kapildihan, nagbuhat-buhat og istorya ang 12th IB, lakip ang 3rd ID, sa pekeng kadaugan batok sa BHB.