Padayon ang pagsulbong sa lapad nga anti-imperyalistang kalihukang masa sa South Korea. Gitukod sa katawhang Korean ang ilang panaghiusa aron kab-oton ang hingpit nga demokrasya ug paglingkawas gikan sa okupasyon sa US. Ang maong nagkadakung protesta nahitabo human sa lapad nga protesta niadtong ulahing bahin sa 2024 ug unang kwarto sa 2025 batok sa maki-US nga papet nga presidente sa nasud. Sa milabayng mga semana, naghimo ang mga grupo sa South Korea ug US og mga porum, dagkung panagtigum ug mga demonstrasyon aron palig-onon ang ilang baruganan.

Martsa alang sa paglingkawas

Niadtong Agosto 15, liboan ka South Korean ang nagmartsa sa Seoul, South Korea aron iduso ang pagpalayas sa US ug mga base militar niini sa nasud, paghunong sa mga war games, ug pagpahimulos niini sa ekonomiya. Giatol ang protesta sa ika-80 nga anibersaryo sa paglingkawas sa South Korea niadtong 1945 gikan sa pagpanakop sa imperyalistang Japan. Gipangulohan ang protesta sa Korean Confederation of Trade Unions (KCTU).

Daku kaayo ang hulga sa imperyalismong US sa kinabuhi ug kalinaw sa Korean Peninsula, matud sa KCTU. Sayod ang mga Korean sa hulga nga dala sa mga US-South Korea war games sama sa Ulchi Freedom Shield 2025, nga gilunsad sugod Agosto 18 hangtud Agosto 28.

Nagtoo ang masang South Korean nga ginagamit ang maong mga war games aron amungon ang ilang nasud sa gubat sa US batok sa kaaway nga imperyalistang China. Gawas sa South Korea, gatusan usab ka mga war games ang ginalunsad sa US sa laing bahin sa Asia-Pacific, lakip sa Pilipinas.

Nagmartsa ang mga grupo padulong sa Ganghwamun, Seoul kung asa namulong si South Korean President Lee Jae Myung. Layo pa lang, giharang na sila sa mga pulis.

Gimakmak nila ang presidente sa nakatakda niinig pakigtigum kang US President Donald Trump sa Agosto 25. Nagtoo sila nga ang panagtigum magdala lamang og dugang pang ganansya sa US ug kalisud sa masang South Korean.

Ginaduso ni Trump sa South Korea ang tinuig nga pagbayad niini og $10 bilyon aron pondohan ang okupasyon sa US gikan sa kanhing $1.13 bilyon ilalum sa Special Measures Agreement. Iya usab nga giduso nga dugangan ang badyet sa depensa ngadto sa 5% sa gross domestic product (GDP) aron ipalit og armas gikan sa US nga nagkantidad og $87 bilyon. Giduso usab ni Trump nga uyunan ni Myung ang bag-ong mga kasabutan mahitungod sa pagdeploy og mga tropa sa US sa South Korea kontra China. Magpahamtang usab si Trump og 25% nga taripa sa mga produkto sa nasud.

Usa ka adlaw ayha niini, nagprotesta ang mga grupo sa pinakadakung langyawng base militar sa US sa Camp Humphreys sa Pyeongtaek, Gyeonggi.

Sa US, gipasiugdahan sa Korean nga grupong Nodutdol ang mga demonstrasyon sa lain-laing estado sa US niadtong Agosto 15-16 aron ipanawagan ang pagpalayas sa US sa Korea.

People’s Summit for Korea

Kapin 500 ka delegado gikan sa US, South Korea ug mga nasud sa Europe ang mitambong sa kinaunhang “People’s Summit for Korea: Towards National Liberation” sa New York City niadtong Hulyo 25-27. Gipangunahan sa Nodutdol ang aktibidad nga gisalmutan usab sa mga grupong nasudnon-demokratikong Pilipino nga nakabase sa US sama sa Bayan-USA.

Gipatawag ang panagtapok isip tubag sa paggrabe sa aktibidad militar sa US sa Korean Peninsula sukad nga natapos ang mga negosasyon tali sa US ug North Korea niadtong 2019. Sukad niadtong 2022, labaw nga midaghan ug migrabe ang mga US-South Korea war games. Naghimo ang US Forces Korea og 200 ka adlaw sa mga war games sa Korea niadtong 2023, ug 275 adlaw sa mga pagbansay niadtong 2024.

Sulod sa duha ka adlaw sa programa, gipaambit sa mga aktibista sa People’s Summit ang mga panglantaw ug pagtulun-an gikan sa mga pakigbisog sa Korean Peninsula aron palayason ang mga base militar sa US, malinawong tapuson ang Korean War, ug panalipdan ang mga demokratikong katungod. Mitampo ang mga aktibistang grupo sa US sa ilang mga paningkamot nga babagan ang pagpalapad sa badyet militar sa US ug uban pang palisiya ni Trump.