Daytoy Agosto, indeklara ti Zionista nga estado ti Israel ti balak a direktan a sakupen ti intero a Gaza Strip, kalpasan ti dandani dua a tawen a panagbombomba iti maysa a brutal a henosidyo laban kadagiti Palestino. Ti plano ket napasingkedan iti miting ti gabinete ni Benjamin Netanyahu idi Agosto 7-8. Mano a lawas sakbay daytoy, immawag met ti parlamento ti Israel a sakupen ti intero a West Bank.

Dagitoy nga addang ket baro a tukad ti panagkaro ti henosidyo ti US-Israel nga addaan panggep a pugipogen ti umili a Palestino.

Idurduron ni Netanyahu ti panagsakop ti Israel idiay Gaza iti tengnga ti kumarkaro a pungtot ti umili nga Israeli laban iti gubyerno na, gapu iti pannakapaay a masubbot dagiti balud ti Palestino a grupo a Hamas, ken gapu iti brutalidad laban kadagiti Palestino. Agsasaruno ti dadakkel a protesta, bayat nga umad-adu dagiti agtutubo nga Israeli nga agkedkedked a sumrek iti militar bilang protesta iti ar-aramiden daytoy a henosidyo.

Palalon a kagurgura ti nakaad-adu a pagilyan ken umili ti Zionista a rehimen. Manipud idi pairtengen daytoy ti kampanya a henosidyo, awan sarday dagiti tignay ti minilyon nga umili iti intero a lubong a tumaktakder para iti panangwayawaya iti Palestine.

Dandanin 90% ti teritoryo ti Gaza ti kontrolado dagiti pwersa ti Israel. Ti laengen nabatbati ket ti Gaza City ken dagiti refugee camp iti tengnga ti Gaza. Agseseksek ti dua a milyon a Palestino kadagitoy a lugar nu sadinno a makapadpadas da ti inaldaw-aldaw a panagbomba ken panagraut, nakaro a bisin ken kinarigat.

Segun iti plano, maikkan dagiti Palestino ti agingga Oktubre 7, iti aldaw ti maikadwa a tawen manipud idi rugyan ti Israel dagiti atake, tapno pumanaw manipud iti Gaza City, ti kadakkelan a syudad iti uneg ti engklabo. Kasaruno daytoy ket agisayangkat ti nasaknap nga atake ti Zionista a militar iti syudad ken dadduma a saan pay a nasaksakop a paset ti intero a Gaza. Ti kano plano ket tapno gibusan ti Hamas, leppasen ti gera ken “tulod ti makatao nga ayuda” kadagiti sibilyan.

Inawagan dagiti grupo a Pilipino ti plano a “nakaam-ames.” Kinundenar met dagiti grupo iti nadumaduma a pagilyan, dagiti internasyunal nga institusyon ken dagiti umili ti nasao a plano.

Manipud pay Marso, absoluto nga imparit ti Isarel ti panangitulod ken panangibunong ti ayuda. Ti laeng naawagan a “Gaza Humanitarian Foundation (GHF),” nga agkabadang a patpatarayen dagiti pwersa a militar ti US ken Israel ti pinalubosan daytoy nga agiwaras ti taraon. Saan a bumaba iti 859 Palestino ti inggagara a pinatay dagiti soldado nga Israeli bayat a nakapila kadagiti distribution site ti GHF. Mainayon da kadagiti napatay bayat nga agiinnuna iti nakabasbassit a taraon nga ayuda.

Dimmanunen iti awan kapada a tukad ti panagbisin idiay Gaza. Dumandanon iti 210 Palestino, kaadwan ket ubbing ti natay gapu iti bisin. Idi Hulyo laeng, 74 ti natay gapu iti malnutrisyon, adu ket naidaliten, kabilang dagiti ubbing nga awan pay lima a tawen. Mainayon isuda iti nasurok 60,000 a direkta a pinatay ken 150,000 ti nasugatan iti panagbomba ken panagatake ti Israel iti 22-bulan a henosidyo. Kinundenar ti nakad-adun a pagilyan ti panagaramat ti US ken Israel iti taraon bilang armas iti panangpawil iti palaban a pakinakem dagiti Palestino.

Saan latta nga agsardeng ti panagbomba ken panagraut ti Israel idiay Gaza Strip. Idi Agosto 10, napatay iti panagbomba ti US-Israel ti peryodista a ni Anas al-Sharif ken ti maysa pay a korespondent ti Al Jazeera a ni Mohammed Qreiqeh ken dagiti camera operator a da Ibrahim Zaher, Mohammed Noufal ken Moamen Aliwa.

Palalo a panaglabsing daytoy iti internasyunal a makatao a linteg nu sadinno a maibilbilang a protektado nga indibidwal dagiti peryodista ken kameng ti midya iti tengnga ti armado a risiris. Manipud 2023, nasuroken 200 a kamkameng ti midya ti inggagara a pinatay ti US-Israel idiay Gaza.