Hini nga Agosto, igindeklara han Zionista nga estado han Israel an larang nga direkta na nga sakupon an bug-os nga Gaza Strip, kahuman han haros duha katuig hini nga panmomba ha usa nga madarahug nga henosidyo kontra ha mga Palestino. Ginpadig-on an plano ha miting han gabinete ni Benjamin Netanyahu hadton Agosto 7-8. Usa kasemana antes hini, nanawagan liwat an parlamento han Israel nga sakupon an bug-os nga West Bank.

Ini nga mga pitad panibag-o nga lebel han paggrabe han henosidyo han US-Israel nga may katuyuanan nga lipulon an katawhan Palestino.

Iginduduso ni Netanyahu an pagsakop han Israel ha Gaza ha butnga han natikagrabe nga kangalas han katawhan Israeli kontra ha iya gubyerno, tungod ha kapakyasan nga mabawi an mga dakop han Palestino nga grupo nga Hamas, ngan tungod ha brutalidad kontra ha mga Palestino. Susrunod an mga dagko nga protesta, samtang natikadamo an mga kabatan-unan nga Israeli nga nadiri nga sumakob ha militar komo protesta ha ginhihimo hini nga henosidyo.

Ura-ura nga ginkakangalsan na han damo kaupay nga nasud ngan katawhan an Zionista nga rehimen. Tikang han papintason hini an kampanya nga henosidyo, waray hunong an mga paggios ngan aksyon han milyun-milyon nga katawhan ha bug-os nga kalibutan nga natindog para ha pagtatalwas han Palestine.

Haros 90% na han teritoryo ha Gaza an kontrolado han mga pwersa han Israel. An nasasalin na la an Gaza City ngan mga refugee camp ha butnga han Gaza. Nagsusuruot an duha kamilyon nga Palestino hini nga mga lugar diin nahiaagum hira han kada adlaw nga panmomba ngan pangatake, grabe nga kagutom ngan kakurian.

Subay ha plano, tatagan an mga Palestino hin tubtob Oktubre 7, ha adlaw han ikaduha katuig tikang han tikangan han Israel an mga atake, agud mag-ebakwet tikang ha Gaza City, an pinakadako nga syudad ha bug-os nga engklabo. Kasunod hini maglalansar han hiluagan nga atake an mga Zionista nga militar ha syudad ngan iba pa nga diri nasasakop nga parte han bug-os nga Gaza. Kunuhay, an plano agud tapuson an Hamas, pag-undang ha gerra ngan “pagdudul-ong han makatawo nga ayuda” ha mga sibilyan.

Gintawag han mga Pilipino nga grupo ini nga plano nga “makangingirhat.” Ginkundenar liwat han mga grupo ha magkalain-lain nga nasud, internasyunal nga mga institusyon ngan mga katawhan an nasering nga plano.

Tikang pa Marso, absoluto nga igindiri han Israel an pagdul-ong ngan panhatag han ayuda. An gintawag nga “Gaza Humanitarian Foundation (GHF)” gud la nga magkabakyang nga ginpapadalagan han mga pwersa militar han US ngan Israel, an gintugutan hini nga magdistribwer han pagkaon. Diri mamenos ha 859 nga Palestino an tuyo nga ginpatay han mga sundalo nga Israeli samtang nakapila ha mga distribution site han GHF. Dugang hira ha mga napatay samtang nag-uunahay ha kulang kaupay nga ayuda nga pagkaon.

Inabot na ha waray katupong an kagutom ha Gaza. Naabot ha 210 nga Palestino, kadam-an bata, an namatay tungod ha kagutom. Hadton Hulyo la, 74 an namatay tungod ha malnutrisyon, damo an masakit na, kaupod an mga bata nga waray pa lima katuig. Dugang hira ha masobra 60,000 nga direkta nga ginpatay ngan 150,000 an nasamaran ha panmomomba ngan pangangatake han Israel ha 22-kabulan nga henosidyo. Ginkundenar han damo na gud nga nasud an paggamit han US ngan Israel ha pagkaon komo armas ha pagpuypoy ha mapan-ato nga diwa han mga Palestino.

Waray hunong pa gihapon an panmomomba ngan pangangatake han Israel ha Gaza Strip. Hadton Agosto 10, napatay ha panmomomba han US-Israel an mamarahayag nga hi Anas al-Sharif, kaupod an usa pa nga korespondent han Al Jazeera nga hi Mohammed Qreiqeh ngan an ira mga camera operator nga hira Ibrahim Zaher, Mohammed Noufal ngan Moamen Aliwa.

Grabe nga pagtalapas ini ilarum han internasyunal nga makatawo nga balaud diin iginkukunsidera nga protektado nga mga indibidwal an mga mamarahayag ha butnga han armado nga sumpakiay. Tikang 2023, lahos 200 nga mamarahayag na an tuyo nga ginpatay han US-Israel ha Gaza.