Gidakop ug tinuyong gipatay sa mga elemento sa 1st IB ug 203rd IBde si Ising Domingo (Ka Mutya), usa ka hors de combat nga Pulang manggugubat, niadtong Agosto 7 sa Barangay Happy Valley, Roxas, Oriental Mindoro. Nagsag-ob siya og tubig dihang gidakop ug gipailalum sa tortyur dihang walay nakuhang impormasyon kaniya ang mga berdugo.

Sa kamot sa parehong yunit militar, gipig-ot ug gihasi ang grupo sa Karapatan-Southern Tagalog nga naglunsad og independyenteng fact-finding mission sa lungsod sa Roxas niadtong Agosto 9-11. Gihadlok ug hinaras sa mga sundalo ang malinawong protesta ug piket sa tim atubangan sa punerarya kung asa nahimutang ang patayng lawas sa mga napatay.

Human niini, nataho sa grupo ang pagpangawat ug pagdagan sa mga sundalo sa 203rd IBde sa mga patayng lawas nilang Ka Mutya, ug usa pa ka Pulang manggugubat nga napatay sa panagsangka nga si Jomari Palomar (Ka Jonnel), sa tungang gabii. Nabutyag usab sa imbestigasyon ang kaylap nga pagharing militar sa sibilyang gubyerno sa Roxas.

Niadtong miaging semana, pugos nga gipabakwit sa mga sundalo ang kapin 1,000 ka pamilya gikan sa mga barangay sa Lantuyang, San Ignacio, Bayanan, ug Bangkatan sa Baco, Oriental Mindoro. Gihimo kini sa militar aron i-sona ang mga residente human nga makaengkwentro ang BHB niadtong Agosto 9 ug Agosto 12 sa Baco. Gipugos ug gitugaw niini ang inadlaw-adlaw nga kinabuhi sa masa.

Pagpamomba. Niadtong Agosto 2, nang-aerial bombing ug nangistraping ang 201st IBde sa lasangong utlanan sa Tagkawayan, Quezon ug Labo, Camarines Norte. Tubag kini sa militar sa nahitabong engkwentro sa BHB niadtong adlawa. Labing gitugaw sa pagpamomba sa AFP ang malinawong komunidad sa mga residente.

Gipig-ot sa mga pulis ug militar ang grupo sa Tanggol Quezon nga nagpahigayon og fact-finding mission kalabot sa mga pagpamomba sa militar sa prubinsya. Tinguha nilang sutaon ang kahimtang sa sibilyang populasyon atubangan sa mas bangis nga operasyong kombat ug pagharihari sa militar.

Pagdakop. Sa walay klarong hinungdan, gidakop sa 77th IB ang mga mag-uumang silang Belmar Garvida ug Ferdinand Bangngad (Willy) sa Sityo Salicsic, Barangay Dampig, Pagudpud, Ilocos Norte niadtong Agosto 11 sa gabii. Paglabay sa pipila ka oras, gibalik sa mga sundalo sa komunidad si Garyida samtang nabilin sa kustodiya sa militar si Bangngad. Sagad nga nakasinati og pagpaniktik, pagpamig-ot ug intimidasyon ang mga biktima ug ang tribo sa lugar tungod sa ilang pagbatok sa proyektong Cabacanan Dam.