Niining milabayng mga semana, sunud-sunod ang pagbasura sa hinimu-himong mga kaso batok sa 18 ka bilanggong pulitikal. Pito kanila ang nakagawas na. Gipamatud-an niini nga ang giatubang nilang mga kaso hinimu-himo ug walay basihan. Tumong lamang niini nga pig-oton ug ibalhog sila sa mga prisohan sa taas ng panahon.

Niadtong Agosto 14, nakagawas ang konsultant sa National Democratic Front of the Philippines (NDFP) nga si Renante Gamara ug mga mamumuo ug aktibistang silang Diony Borre ug Raul Razo. Human kini sa desisyon sa hukum nga dili sila sad-an, uban ang lain pang duha nga silang Tirso Alcantara, konsultant sa NDFP, ug organisador sa mag-uuma nga si Dionisio Almonte, sa mga kasong kidnapping nga may lakip nga pagpatay ug pakyas nga pagpatay. Giakusahan silang imbwelto sa pagkidnap ug pagpatay sa usa ka sundalo ug pakyas nga pagpatay sa usa ka “kanhing rebelde” sa Mauban, Quezon nga nahitabo niadtong Mayo 2007.

Niadto usang Agosto 14, nakagawas silang kanhing UP Student Regent Desiree Jaranilla-Patun-og ug organisador sa mag-uuma nga si Maria Theresa Buscayno human gibasura sa korte ang kasong illegal possession of firearms and explosives nga gipasaka kanila ug kag Andres Ely ug Oliver Millo. Sila ang gitawag og Mexico 4. Gibasura ang kaso tungod sa kawalay igong ebidensya. Nagpabiling nakapriso silang Millo ug Ely tungod sa mga kasong ginaatubang pa nila sa mga korte sa Nueva Ecija ug Zambales.

Niadtong Agosto 6, gibasura sa usa ka korte sa Taguig City ang kaso sa illegal possession of firearms and ammunition batok sa lima ka bilanggong pulitikal nga gitawag og Sta. Cruz 5. Ang lima gilangkuban sa konsultant sa NDFP nga si Adelberto Silva, Ireneo Atadero, Hedda Calderon, Edisel Legaspi ug Julio Lusiana. Matud sa korte, dili paigo ang ebidensya ug kadudahan ang pamaagi sa pagkuha sa “ebidensya” batok kanila. Malingkawasnon na silang Atadero ug Lusiana, samtang nauna nang nakapyansa si Calderon niadtong Hunyo 2019. Magpabiling napriso silang Silva ug Legaspi sa uban pang ginaatubang nga kasong pagpatay.

Niadtong Agosto 6, nagpagula usab og desisyon ang usa ka korte sa Don Carlos, Bukidnon alang sa “provisional dismissal” sa kasong sulay nga pagpatay ug pagpatay batok kang Charisse “Chaba” Bañez ug Arjie Dadizon, duha sa Agusan 6. Lambigit ang kaso sa usa ka ginasulting engkwentro tali sa BHB ug militar niadtong 2022. Nataho usab karong bulana ang “provisional dismissal” sa kasong attempted homicide batok kang Louvaine Espina sa Davao Oriental. Gawas nilang Bañez, Dadizon ug Espina, gilangkuban ang Agusan 6 nilang Ronnie Igloria, Larry Montero ug Grace “Nik-nik” Man-aning. Nagabyahe sila niadtong Hunyo 13 gikan sa Monkayo sa Davao De Oro dihang giharang ang ilang sakyanan sa usa ka tsekpoynt ug gidakop.

Niadtong Agosto 4, gibasura sa korte sa Cagayan ang kasong pakyas nga pagpatay batok kang Myrna Cruz-Abraham. Giaresto si Abraham niadtong Enero 27 samtang kauban ang iyang pamilya sa usa ka mall sa San Miguel, Bulacan. Nakagawas siya usa ka semana human magpyansa.

Sa usa ka resolusyon niadtong Mayo 29, gibasura sa Department of Justice ang asuntong “terrorism financing” nga gipasaka sa mga pwersa sa estado batok kang Myrna Zapanta. Si Zapanta usa ka tawong-simbahan ug tigpanalipud sa katungod sa mga mag-uuma. Walay igong ebidensya nga nagpamatuud sa akusasyon nga ginapondohan niya ang BHB.

Nagmalampuson usab ang mga bilanggong pulitikal sa pagtangtang sa abusadong warden sa Tacloban City Jail nga si J/Insp Eva Naputo niadtong Agosto 16. Gireklamo si Naputo sa Altermidya Network ug uban pang grupo tungod sa iyang pag-abuso sa mga bilanggo, ilabina kontra sa giilang Tacloban 5 nga gilangkuban sa midya nga si Frenchie Mae Cumpio, ug tawong-simbahan nga si Marielle Domequil.

Atubangan sa maong ligal nga kadaugan, padayon ang panawagan para ipalingkawas ang kapin 700 ka bilanggong pulitikal sa nasud nga nakasinati og grabeng dugay nga detensyon tungod sa langan nga proseso sa mga pagdungog sa reaksyunaryong korte ug mga taktika sa pagdelatar sa rehimeng Marcos ug armadong pwersa niini.