Hadin linabay nga mga semana, susrunod an pagpapabasura ha hinimu- himo nga mga kaso kontra ha 18 nga priso pulitikal. Pito ha ira an nakagawas na. Ginpamatud-an hini nga an ginkaatubang nira nga mga kaso hinimu-himo ngan waray basaranan. Tuyo la hini nga gipiton ngan maihaan hira nga igdetiner ha mga prisuhan.

Hadton Agosto 14, nakagawas an konsultant han National Democratic Front of the Philippines (NDFP) nga hi Renante Gamara ngan mga trabahador ngan aktibista nga hira Diony Borre ngan Raul Razo. Kasunod hini an pagpapawaray-sala ha ira, kaupod an duha nga iba pa nga hira Tirso Alcantara, konsultant han NDFP, ngan organisador han parag-uma nga hi Dionisio Almonte, ha mga kaso nga kidnapping nga may kasumpay nga pagpatay ngan pakyas nga pagpatay. Gin-akusahan hira nga dabi ha pagkidnap ngan pagpatay ha usa nga sundalo ngan pakyas nga pagpatay ha usa nga “hadto anay rebelde” ha Mauban, Quezon nga nahitabo hadton Mayo 2007.

Hadton Agosto 14 gihapon, nakagawas hira hadto anay UP Student Regent Desiree Jaranilla-Patun-og ngan organisador han parag-uma nga hi Maria Theresa Buscayno kahuman igpabasura han korte an kaso nga illegal possession of firearms and explosives nga iginsalawad ha ira ngan kanda Andres Ely ngan Oliver Millo. Hira an gintatawag nga Mexico 4. Iginpabasura an kaso tungod ha kawaray hin sadang nga ebidensya. Nagpapabilin nga nakapriso hira Millo ngan Ely tungod ha mga kaso nga ginkakaatubang pa ha mga korte ha Nueva Ecija ngan Zambales.

Hadton Agosto 6, ginpawarayan-sala han usa nga korte ha Taguig City an kaso han illegal possession of firearms and ammunition kontra ha lima nga priso pulitikal nga gintawag nga Sta. Cruz 5. An lima ginkakaapihan han konsultant han NDFP nga hi Adelberto Silva, Ireneo Atadero, Hedda Calderon, Edisel Legaspi ngan Julio Lusiana. Sigon ha korte, diri sadang an ebidensya ngan urusahon an pamaagi han pagkuha han “ebidensya” kontra ha ira. Nakagawas na hira Atadero ngan Lusiana, samtang nahiuna na nga nakagpiyansa hi Calderon hadton Hunyo 2019. Magpapabilin nga nakapriso hira Silva ngan Legaspi ha iba pa nga ginkakaatubang nga kaso nga pagpatay.

Hadton liwat nga Agosto 6, nagpagawas han desisyon an usa nga korte ha Don Carlos, Bukidnon para ha “provisional dismissal” han kaso nga gin-atentar nga pagpatay ngan pagpatay kontra kan Charisse “Chaba” Bañez ngan Arjie Dadizon, duha ha Agusan 6. Kasumpay an kaso ha usa nga ginsesering nga engkwentro giutan han BHB ngan militar hadton 2022. Nahireport liwat yana nga bulan an “provisional dismissal” ha kaso nga attempted homicide kontra kan Louvaine Espina ha Davao Oriental. Labot kanra Bañez, Dadizon ngan Espina, ginkokomponer an Agusan 6 nira Ronnie Igloria, Larry Montero ngan Grace “Nik-nik” Man-aning. Nabiyahe hira hadton Hunyo 13 tikang ha Monkayo ha Davao De Oro han ulangon an ira sarakyan ha usa nga tsekpoynt ngan dinakop.

Hadton Agosto 4, iginpabasura han korte ha Cagayan an kaso nga pakyas nga pagpatay kontra kan Myrna Cruz-Abraham. Gin-aresto hi Abraham hadton Enero 27 samtang kaupod an iya pamilya ha usa nga mall ha San Miguel, Bulacan. Nakagawas hiya usa kasemana kahuman magpiyansa.

Ha usa nga resolusyon hadton Mayo 29, iginpabasura han Department of Justice an kaso nga “terrorism financing” nga iginsalawad han mga pwersa han estado kontra kan Myrna Zapanta. Hi Zapanta usa nga tawo ha singbahan ngan tag-undong han katungod han mga parag-uma. Waray sadang nga ebidensya nga nagpapamatuod ha akusasyon nga nagpopondo hiya ha BHB.

Kadaugan liwat para ha mga priso pulitikal an pagtanggal ha abusado nga warden han Tacloban City Jail nga hi J/Insp Eva Naputo hadton Agosto 16. Iginreklamo hi Naputo han Altermidya Network ngan iba pa nga grupo tungod ha iya pag-abuso ha mga priso, labina kontra ha gintawag nga Tacloban 5 nga ginkakaapihan han mamarahayag nga hi Frenchie Mae Cumpio, ngan tawo ha singbahan nga hi Marielle Domequil.

Atubangan hini nga pira nga ligal nga kadaugan, padayon an panawagan para pagawason an masobra 700 nga priso pulitikal ha nasud nga nahiaagum han grabe kamaiha nga detensyon tungod ha malangan nga paglarga han mga pagbista ha reaksyunaryo nga korte ngan mga taktika han pagdelatar han rehimen Marcos ngan armado nga pwersa hini.