Sining nagligad nga mga semana, asod-asod nga ginbasura ang himo-himo nga mga kaso batuk sa 18 ka bilanggong pulitikal. Pito sa ila ang nahilway na. Ginpamatud-an sini nga ang ginaatubang nila nga mga kaso himo-himo kag wala sang basehan.Tuyo lang sini nga ipiton kag malawigon sila nga prisohon sa mga prisohan.

Sadtong Agosto 14, nahilway ang konsultant sang National Democratic Front of the Philippines (NDFP) nga si Renante Gamara kag mga mamumugon kag aktibista nga sanday Diony Borre kag Raul Razo. Sunod ini sang pamatbat sa ila nga wala sang kasal-anan, kaupod ang duha ka iban pa nga sila Tirso Alcantara, konsultant sang NDFP, kag organisador sang mangunguma nga si Dionisio Almonte, sa mga kaso nga kidnapping may kaangtanan sa pagpatay kag paslaw nga pagpatay.

Ginapasibangdan sila nga imbolbado sa pagkidnap kag pagpatay sa isa ka soldado kag paslaw nga pagpatay sa isa ka “anay rebelde” sa Mauban, Quezon nga natabo sadtong Mayo 2007.

Sang Agosto 14 man, nahilway sanday anay UP Student Regent Desiree Jaranilla-Patun-og kag organisador sang mangunguma nga si Maria Theresa Buscayno pagkatapos nga ibasura sang korte ang kaso nga illegal possession of firearms and explosives nga ginpasaka sa ila kag nanday Andres Ely kag Oliver Millo. Sila ang ginatawag nga Mexico 4. Ginbasura ang kaso tungod sa kawad-on sang nagakaigo nga ebidensya. Nagapabilin nga nabilanggo sanday Millo kag Ely tungod sa mga kaso nga ginaatubang pa sa mga korte sa Nueva Ecija kag Zambales.

Sadtong Agosto 6, ginbasura sang isa ka korte sa Taguig City ang kaso sang illegal possession of firearms and ammunition batuk sa lima ka bilanggong pulitikal nga ginatawag nga Sta. Cruz 5. Ang lima ginalakipan sang konsultant sang NDFP nga si Adelberto Silva, Ireneo Atadero, Hedda Calderon, Edisel Legaspi kag Julio Lusiana. Suno sa korte, indi bastante ang ebidensya kag makaduluda ang pamaagi sang pagkuha sang “ebidensya” batuk sa ila. Nahilway na sanday Atadero kag Lusiana, samtang una na nga nakapyansa si Calderon sadtong Hunyo 2019. Nagapabilin nga nabilanggo sanday Silva kag Legaspi sa iban pa nga ginaatubang nga kaso nga pagpatay.

Sadto man Agosto 6, nagpaguwa sang desisyon ang isa ka korte sa Don Carlos, Bukidnon para sa “provisional dismissal” sa kaso nga tuyo nga pagpatay kag pagpatay batuk kay Charisse “Chaba” Bañez kag Arjie Dadizon, duha sa Agusan 6. May kaangot ang kaso sa isa ka ginasiling engkwentro sa tunga sang BHB kag militar sadtong 2022. Na-report man subong nga bulan ang “provisional dismissal” sa kaso nga attempted homicide batuk kay Louvaine Espina sa Davao Oriental. Magluwas nanday Bañez, Dadizon kag Espina, ginabug-os ang Agusan 6 nanday Ronnie Igloria, Larry Montero kag Grace “Nik-nik” Man-aning. Nagabyahe sila sadtong Hunyo 13 halin sa Monkayo sa Davao De Oro sang banggaan ang ila salakyan sa isa ka tsekpoynt kag gindakop.

Sadtong Agosto 4, ginbasura sang korte sa Cagayan ang kaso nga paslaw nga pagpatay batuk kay Myrna Cruz-Abraham. Gin-aresto si Abraham sadtong Enero 27 samtang kaupod ang iya pamilya sa isa ka mall sa San Miguel, Bulacan. Nahilway siya isa ka semana pagkatapos magpyansa.

Sa isa ka resolusyon sadtong Mayo 29, ginbasura sang Department of Justice ang asunto nga “terrorism financing” nga ginpasaka sang mga pwersa sang estado batuk kay Myrna Zapanta. Si Zapanta isa ka tawong simbahan kag tigtib-ong sang kinamatarung sang mga mangunguma. Wala sang bastante nga ebidensya nga nagapamatuod sa akusasyon nga nagapondo siya sa BHB.

Kadalag-an man para sa mga bilanggong pulitikal ang pagkakas sa abusado nga warden sang Tacloban City Jail nga si J/Insp Eva Naputo sadtong Agosto 16. Ginreklamo si Naputo sang Altermidya Network kag iban pa nga grupo tungod sa iya pagpang-abuso sa mga bilanggo, ilabi na batuk sa ginatawag nga Tacloban 5 nga ginalakipan sang mamalitha nga si Frenchie Mae Cumpio, kag tawong-simbahan nga si Marielle Domequil.

Sa atubang sang pila ka ligal nga kadalag-an nga ini, padayon ang panawagan para hilwayon ang masobra 700 ka bilanggong pulitikal sa pungsod nga nagaantus sang tuman ka dugay nga detensyon tungod sa mahinay nga pag-idog sang mga pagbista sa reaksyonaryong korte kag mga taktika sa pagpaatrasar sang rehimen Marcos kag armadong pwersa sini.