Kadagitoy napalabas a lawas, agsasaruno ti panagibasura kadagiti pinarbo a kaso laban iti 18 a balud pulitikal. Pito kadakwada ti nawayawayaanen. Pinaneknekan daytoy a ti sinango da a kaskaso ket pinarbo ken awanan ti basaran. Panggep laeng daytoy a lipiten ken napaut a maibalud da.

Idi Agosto 14, naruk-atan ti konsultant ti National Democratic Front of the Philippines (NDFP) a ni Renante Gamara ken dagiti mangmangged ken aktibista a da Diony Borre ken Raul Razo. Kasaruno daytoy ti panangwaswas iti kaso, kadwa da ti dua pay a da Tirso Alcantara, konsultant ti NDFP ken organisador ti mannalon a ni Dionisio Almonte, kadagiti kaso a kidnapping nga addaan kanaig a pammapatay ken napaay a pammapatay. Mapabpabasol isuda a karaman iti panagkidnap ken pammapatay iti maysa a soldado ken napaay a pammapatay iti maysa a “dati a rebelde” idiay Mauban, Quezon a napasamak idi Mayo 2007.

Idi met Agosto 14, nakaruk-at da sigud a UP Student Regent Desiree Jaranilla-Patun-og ken ti organisador ti mannalon a ni Maria Theresa Buscayno kalpasan nga ibasura ti korte ti kaso nga illegal possession of firearms and explosives a naidarum kadakwada ken kada Andres Ely ken Oliver Millo. Isuda ket maaw-awagan a Mexico 4. Naibasura ti kaso gapu iti kinaawan ti naan-anay nga ebidensya. Agtaltalinaed a nakabalud da Millo ken Ely gapu kadagiti kaso a sangsangwenda pay kadagiti korte idiay Nueva Ecija ken Zambales.

Idi Agosto 6, winaswas ti maysa a korte idiay Taguig City ti kaso ti illegal possession of firearms and ammunition laban iti lima a balud pulitikal iti naawagan a Sta. Cruz 5. Ti lima ket pakaibilangan ti konsultant ti NDFP a ni Adelberto Silva, Ireneo Atadero, Hedda Calderon, Edisel Legaspi ken Julio Lusiana. Segun iti korte, saan nga umanay ti ebidensya ken mapagdudwaan ti pamuspusan ti panangala ti “ebidensya” laban kadakwada. Nawayawayaanen da Atadero ken Lusiana, bayat nga immunan a nakapagpyansa ni Calderon idi Hunyo 2019. Agtalinaed iti pagbaludan da Silva ken Legaspi iti dadduma pay a sangsangwen da a kaso a pammapatay.

Idi met laeng Agosto 6, nagirwar ti desisyon ti maysa a korte iti Don Carlos, Bukidnon para iti “provisional dismissal” ti kaso ti gandat a pammapatay ken pammapatay laban ken Charisse “Chaba” Bañez ken Arjie Dadizon, dua iti Agusan 6. Ti kaso ket kanaig iti makunkuna nga engkwentro iti baet ti NPA ken militar idi 2022. Naiyulat met tatta a bulan ti “provisional dismissal” iti kaso nga attempted homicide laban ken Louvaine Espina idiay Davao Oriental. Malaksid kada Bañez, Dadizon ken Espina, ti Agusan 6 ket bukbuklen da Ronnie Igloria, Larry Montero ken Grace “Nik-nik” Man-aning. Agbibyahe da idi Hunyo 13 manipud idiay Monkayo, Davao de Oro idi mapasardeng ti lugan da iti maysa a tsekpoynt ken natiliw isuda.

Idi Agosto 4, imbasura ti korte idiay Cagayan ti kaso a napaay a pammapatay laban ken Myrna Cruz-Abraham. Ni Abraham ket naaresto idi Enero 27 bayat a kadwa na ti pamilya na iti maysa a mall idiay San Miguel, Bulacan. Nawayawayaan isuna maysa a lawas kalpasan nga agpyansa.

Iti maysa a resolusyon idi Mayo 29, imbasura ti Department of Justice ti asunto a “terrorism financing” nga impila dagiti pwersa ti estado laban ken Myrna Zapanta. Ni Zapanta ket maysa a tao’t simbaan ken salaknib ti karbengan dagiti mannalon. Awan ti naan-anay nga ebidensya a mangipanpaneknek iti pammabasol nga agponpondo isuna iti NPA.

Balligi met para kadagiti balud pulitikal ti panangikkat iti abusado a warden ti Tacloban City Jail a ni J/Insp Eva Naputo idi Agosto 16. Ni Naputo ket inreklamo ti Altermidya Network ken dadduma pay a grupo gapu iti panangabuso na kadagiti balud, nangruna kontra iti naawagan a Tacloban 5 a pakaibilangan ti peryodista a ni Frenchie Mae Cumpio ken ti tao’t simbaan a ni Marielle Domequil.

Iti sango dagitoy mano a ligal a balligi, agtultuloy ti awag tapno wayawayaan ti nasurok 700 a balud pulitikal iti pagilyan a makapadpadas ti palalo a nabayag a pannakabalud gapu iti nabayag a panaggunay dagiti panagdengngeg iti reaksyunaryo a korte ken dagiti taktika ti panangitantan ti rehimen Marcos ken armado a pwersa daytoy.