Gindakop kag hungod nga ginpatay sang mga elemento sang 1st IB kag 203rd IBde si Ising Domingo (Ka Mutya), isa ka hors de combat nga Pulang hangaway, sadtong Agosto 7 sa Barangay Happy Valley, Roxas, Oriental Mindoro. Nagasag-ob siya sang tubig sang nadakop kag ginpaidalum sa tortyur nga wala sang makuha nga impormasyon sa iya ang mga berdugo.

Sa kamot sang amo nga yunit militar, nakaagum sang pagpang-ipit kag pagpang-haras ang grupo sang Karapatan-Southern Tagalog nga naglunsar sang independyente nga fact-finding mission sa banwa sang Roxas sadtong Agosto 9-11. Ginhadlok kag ginharas sang mga soldado ang malinong nga protesta kag piket sang tim sa atubang sang punerarya kon diin nahamyang ang bangkay sang mga napatay.

Sunod sini, gin-report sang grupo ang pagkawat kag pagpalagyo sang mga soldado sang 203rd IBde sa mga bangkay nanday Ka Mutya, kag isa pa ka Pulang hangaway nga napatay sa inaway nga si Jomari Palomar (Ka Jonnel), sa tungang gab-i. Nabuyagyag man sa imbestigasyon ang pagluntad sang paghari militar sa sibilyan nga gobyerno sang Roxas.

Sadtong nagligad nga semana, pilit nga ginpalayas sang mga soldado ang kapin sa 1,000 ka pamilya halin sa mga barangay sang Lantuyang, San Ignacio, Bayanan, kag Bangkatan sa Baco, Oriental Mindoro. Ginpatigayon ini sang militar para i-sona ang mga residente sunod sang mga inaway sa BHB sadtong Agosto 12 sa Baco. Gin-perwisyo kag gingamo ang adlaw-adlaw nga kabuhi sang masa.

Pagpangbomba. Sadtong Agosto 2, nagpatigayon sang aerial bombing kag pag-istraping ang 201st IBde sa kagulangan nga dulunan sang Tagkawayan, Quezon kag Labo, Camarines Norte. Sabat ini sang militar sa natabo nga engkwentro sa BHB sang adlaw nga ini. Lubos nga gingamo sang pagpangbomba sang AFP ang malinong nga komunidad sang mga residente.

Nakaagi sang pagpang-ipit halin sa pulis kag militar ang grupo sang Tanggol Quezon nga nagpatigayon sang fact-finding mission angot sa mga pagpangbomba sang militar sa probinsya. Tuyo nila nga hibaluon ang kahimtangan sang sibilyan nga populasyon sa atubang sang ginpasingki nga operasyon kombat kag paghari militar.

Pagdakop. Sa wala sang maathag nga rason, gindakop sang 77th IB ang mga mangunguma nga sanday Belmar Garvida kag Ferdinand Bangngad (Willy) sa Sityo Salicsic, Barangay Dampig, Pagudpud, Ilocos Norte sadtong Agosto 11 sang gab-i. Pagkatapos ang pila ka oras, ginbalik sang mga soldado sa komunidad si Garyida samtang nabilin sa kustodiya sang militar si Bangngad. Masami nga nagaagum sang pagpanilag, pagpang-ipit kag intimidasyon ang mga biktima kag ang tribo sa lugar tungod sa ila panindugan batuk sa proyektong Cabacanan Dam.