Kinemmeg ken inggagara a pinatay dagiti elemento ti 1st IB ken 203rd IBde ni Ising Domingo (Ka Mutya), maysa a hors de combat a Nalabbaga a mannakigubat, idi Agosto 7 iti Barangay Happy Valley, Roxas, Oriental Mindoro. Tiniliw da isuna bayat nga agsaksakdo ti danum ken tinortyur da idi awan ti maala nga impormasyon dagiti berdugo kenkwana.

Iti ima ti kapada a yunit ti militar, nakapadas ti panaglipit ken panagharas ti grupo ti Karapatan-Southern Tagalog a nagisayangkat ti independyente a fact-finding mission iti ili ti Roxas idi Agosto 9-11. Binutbuteng ken hinaras dagiti soldado ti naulimek a protesta ken piket ti tim iti sango ti punerarya nga ayan dagiti bangkay dagiti napapatay.

Kasaruno daytoy, naimaldit ti grupo ti panagtakaw ken panangitaray dagiti soldado ti 203rd IBde kadagiti bangkay da Ka Mutya ken maysa pay a Nalabbaga a mannakigubat a napatay iti labanan a ni Jomari Palomar (Ka Jonnel), iti katengngaan iti rabii. Naiparang met iti imbestigasyon ti panagari ti militar iti sibilyan a gubyerno ti Roxas.

Idi napalabas a lawas, ingkapilitan a pinapanaw dagiti soldado ti nasurok 1,000 pamilya manipud kadagiti barangay ti Lantuyang, San Ignacio, Bayanan ken Bangkatan idiay Baco, Oriental Mindoro. Inyaramid daytoy ti militar tapno i-sona dagiti residente kasaruno dagiti labanan iti NPA idi Agosto 9 ken Agosto 12 idiay Baco. Pinerwisyo ken riniribuk da ti inaldaw a panagbiag ti masa.

Panagbomba. Idi Agosto 2, nagbomba manipud tangatang ken nagistraping ti 201st IBde iti kabakiran iti nagbeddengan ti Tagkawayan, Quezon ken Labo, Camarines Norte. Sungbat daytoy ti militar iti napasamak nga engkwentro iti NPA idi bigat ti didiay nga aldaw. Palalo a riniribuk ti panagbomba ti AFP ti natalna a komunidad dagiti residente.

Nakapadas ti panaglipit manipud iti pulis ken militar ti grupo ti Tanggol Quezon a nagiyaramid ti fact-finding mission kanaig dagiti panagbomba ti militar iti prubinsya. Pinanggep da nga amwen ti kasasaad ti sibilyan a populasyon iti sango ti pinarungsot nga operasyon kombat ken panagari a militar.

Panagkemmeg. Iti saan a nalawag a makagapu, kinemmeg ti 77th IB dagiti mannalon a da Belmar Garvida ken Ferdinand Bangngad (Willy) iti Sityo Salicsic, Barangay Dampig, Pagudpud, Ilocos Norte idi Agosto 11 ti rabii. Kalpasan ti mano nga oras, insubli dagiti soldado iti komunidad ni Garvida bayat a naibati iti kustodiya ti militar ni Bangngad. Masansan a makapadpadas ti surbeylans, panaglipit ken intimidasyon dagiti biktima ken ti tribo iti lugar gapu iti takder da laban iti proyekto a Cabacanan Dam.