Gindakop ngan tuyo nga ginpatay han mga elemento han 1st IB ngan 203rd IBde hi Ising Domingo (Ka Mutya), usa nga hors de combat nga Pula nga mangaraway, hadton Agosto 7 ha Barangay Happy Valley, Roxas, Oriental Mindoro. Naalog hiya hin tubig han nadakop ngan iginpailarum ha tortyur hin waray makuha nga impormasyon ha iya an mga berdugo.

Ha kamot han pareho nga yunit han militar, nahiagum han pan-gigipit ngan panhaharas an grupo han Karapatan-Southern Tagalog nga naglansar han independyente nga fact-finding mission ha bungto han Roxas hadton Agosto 9-11. Ginhadlok ngan ginharas han mga sundalo an mamingaw nga protesta ngan piket han tim ha atubangan han punerarya diin nakadto an patay nga lawas han mga pinatay.

Kasunod hini, nahirekord han grupo an pagkawat ngan pagtabag han mga sundalo han 203rd IBde ha mga patay nga lawas nira Ka Mutya, ngan usa pa nga Pula nga mangaraway nga napatay ha agway nga hi Jomari Palomar (Ka Jonnel), ha katutngaan han gab-i. Nabuksas liwat ha imbestigasyon an pag-ungbaw han militar nga paghahadi ha sibilyan nga gubyerno han Roxas.

Hadton linabay nga semana, pwersahan nga ginpa- ebakwet han mga sundalo an masobra 1,000 nga pamilya tikang ha mga barangay han Lantuyang, San Ignacio, Bayanan, ngan Bangkatan ha Baco, Oriental Mindoro. Iginhimo ini han militar agud ig-sona an mga residente kasunod han mga agway ha BHB hadton Agosto 9 ngan Agosto 12 ha Baco. Ginperwisyo ngan ginringgal hini an matag-adlaw nga kinabuhi han masa.

Panmomba. Hadton Agosto 2, naghimo han aerial bombing ngan pag-istraping an 201st IBde ha kagugub-an nga bawnderi han Tagkawayan, Quezon ngan Labo, Camarines Norte. Baton ini han militar ha nahitabo nga engkwentro ha BHB han aga hiton nga adlaw. Grabe nga ginribok han panmomba han AFP an murayaw nga komunidad han mga residente.

Nahiagum han pan-gigipit tikang ha pulis ngan militar an grupo han Tanggol Quezon nga naghimo han fact-finding mission kasumpay han mga panmomba han militar ha prubinsya. Gintuyo nira nga hibaruan an kamutangan han sibilyan nga populasyon atubangan han ginpabangis nga operasyon nga kombat ngan paghahadi nga militar.

Pagdakop. Ha waray klaro nga basaranan, gindakop han 77th IB an mga parag-uma nga hira Belmar Garvida ngan Ferdinand Bangngad (Willy) ha Sityo Salicsic, Barangay Dampig, Pagudpud, Ilocos Norte hadton Agosto 11 han gab-i. Kataliwan han pira kaoras, iginbalik han mga sundalo ha komunidad hi Garvida samtang nahibilin ha kustodiya han militar hi Bangngad. Agsub nga mahiagum han pangespiya, pan-gigipit ngan intimidasyon an mga biktima ngan an tribo ha lugar tungod ha ira panindugan kontra ha proyekto nga Cabacanan Dam.