Magkabulag nga mga protesta an iginlansar han mga grupo nga Moro ngan Pilipino agud mahugot nga kundenahon an paggrabe han henosidyo han US-Israel ha Gaza hadin linabay nga mga semana ngan igpanawagan an kadagmitan nga pag-undang han mga atake, ig-insister an pagpapasakob han mga ayuda ngan katalwasan para ha mga Palestino.

Hadton Agosto 15, inabot ha 1,300 nga Moro ha Marawi City para ha usa nga “mamurayaw nga pakig-urusa ngan panmasa nga demonstrasyon para ha Gaza.” Nagmartsa hira tikang ha Masjed Bato tipakadto ha Sarimanok Stadium ha Ground Zero han syudad, an lugar nga ginrumok han grabe nga panmomba han rehimen Duterte ngan Armed Forces of the Philippines (AFP) hadton 2017. Igintanding nira an pagruba han AFP ha ira syudad ha ginhihimo nga panmomba yana han pwersa nga US-Israel ha Gaza. Antes hini, nagkamayda han “walk for peace” ha syudad hadton Agosto 9.

Hadton Agosto 9 gihapon, naghimo han indignation rally an Bagong Alyansang Makabayan (Bayan), Moro-Christian Peoples Alliance ngan Philippine-Palestine Friendship Association ha Quezon City agud kundenahon an pagpasa han gabinete han Israel han desisyon agud direkta na nga sakupon han militar hini an Gaza.

Hadton Agosto 13 gihapon, nagprotesta an mga mamarahayag, grupo nga kabatan-unan ngan midya ha sakob han University of the Philippines ha Diliman, Quezon City agud kundenahon an panibag-o nga kaso han panmatay han US-Israel ha mamarahayag ha Palestine.