Nagsisina a protesta ti insayangkat dagiti grupo a Moro ken Pilipino tapno nairut a kundenaren ti panagsardeng ti henosidyo ti US-Israel iti Gaza kadagitoy napalabas a lawas ken naiyawag ti madagdagus a panagsardeng dagiti atake, ti panagpaserrek ti ayuda ken wayawaya dagiti Palestino.

Idi Agosto 15, dimmanon iti 1,300 Moro ti nagtitipon para iti “natalinaay a pannakipagkaykaysa ken demonstrasyon masa para iti Gaza” idiay Marawi City. Nagmartsa da manipud Masjed Bato agturong ti Sarimanok Stadium iti Ground Zero ti syudad, ti lugar a pinulbos ti nakaro a panagbomba ti rehimen Duterte ken Armed Forces of the Philippines (AFP) idi 2017. Ipadpada da ti panangdadael ti AFP iti syudad da iti ar-aramiden a panagbombomba tatta ti pwersa nga US-Israel idiay Gaza. Sakbay daytoy, napasamak ti “walk for peace” iti syudad idi Agosto 9.

Idi met Agosto 9, nagiyaramid ti indignation rally ti Bagong Alyansang Makabayan (Bayan), Moro-Christian Peoples Alliance ken Philippine-Palestine Friendship Association idiay Quezon City tapno kundenaren ti panagipasa ti gabinete ti Israel ti desisyon tapno direktan a sakupen ti militar daytoy ti Gaza.

Idi met Agosto 13, nagprotesta dagiti peryodista, grupo ti agtutubo ken midya iti uneg ti University of the Philippines iti Diliman, Quezon City tapno kundenaren ti baro a kaso ti pammapatay ti US-Israel iti peryodista iti Palestine.