Separado nga mga protesta ang ginlunsar sang mga grupo nga Moro kag Pilipino para hugot nga pakalamauton ang pagsingki sang henosidyo sang US-Israel sa Gaza sining nagligad nga mga semana kag ginpanawagan ang gilayon nga pag-untat sang mga atake, igiit ang pagpasulod sang ayuda kag kahilwayan para sa mga Palestino.

Sadtong Agosto 15, naglab-ot sa 1,300 ka Moro sa Marawi City ang nagtipon para sa isa ka “malinong nga pag-ugyon kag demonstrasyon masa para sa Gaza.” Nagmartsa sila halin sa Masjed Bato padulong sa Sarimanok Stadium sa Ground Zero sang syudad, ang lugar nga ginpulbos sang grabe nga pagpangbomba sang rehimen Duterte kag Armed Forces of the Philippines (AFP) sadtong 2017. Ginpaanggid nila ang pagwasak sang AFP sa ila syudad sa ginahimo nga pagpangbomba subong sang pwersa sang US-Israel sa Gaza. Antes sini, may “walk for peace” sa syudad sadtong Agosto 9.

Sadto man Agosto 9, nagpatigayon sang indignation rally ang Bagong Alyansang Makabayan (Bayan), Moro-Christian Peoples Alliance kag Philippine-Palestine Friendship Association sa Quezon City para pakamalauton ang pagpasar sang gabinete sang Israel sang desisyon nga direkta na nga sakupon sang militar sini ang Gaza.

Sadto man Agosto 13, nagprotesta ang mga mamalitha, grupo sang pamatan-on kag midya sa sulod sang University of the Philippines sa Diliman, Quezon City para pakamalauton ang panibag-o nga kaso sang pagpamatay sang US-Israel sa mamalitha sa Palestine.