Dako nga tampa sa nawong sang rehimen US-Marcos kag mga opisyal sang Armed Forces of the Philippines (AFP) ang asod-asod nga armadong aksyon sang Bagong Hukbong Bayan (BHB) sa pila ka mga probinsya sa pungsod. Sunod ini sa pahayag sang rehimen nga “wala na sang grupong gerilya” sadtong Hulyo sa ika-4 nga SONA.

Sadtong Agosto 12, tatlo ka soldado lakip ang isa ka kapitan sang 1st Scout Ranger Regiment sa idalum sang 203rd IBde ang napatay sa ikaduha nga inaway sa adlaw nga ini sa tunga BHB-Mindoro (Lucio de Guzman Command) kag militar sa Barangay Lantuyang 2, Baco, Oriental Mindoro. Naigo sa ulo kag gilayon nga napatay ang lider sang yunit nga si Capt. Marky John Alberto. Tatlo ka pasista nga soldado pa ang napilasan.

Pila ka adlaw antes sini, isa ka soldado sang 203rd IBde ang napatay sang BHB-Mindoro sa aktibo nga depensa batuk sa naga-atake nga yunit sang kaaway sa Barangay Mangangan 2 sa Baco sadtong Agosto 9 sang aga.

Sa Quezon, ginpaulanan sang bala sang isa ka yunit sang BHB-Quezon (Apolonio Mendoza Command) ang isa ka bag-ong tukod nga kampo militar sang 85th IB sa Barangay Cogorin Ibaba, Lopez sadtong Agosto 2. Ginpatigayon sang yunit ang pagpangharas sang alas-7:30 sang gab-i.

Ginkalipay sang pumuluyo sang Quezon ang pag-atake tungod luyag nila nga pasabton sa mga krimen ang berdugo nga batalyon kag mahatagan sang hustisya ang ila mga biktima nga mangunguma.

Sa Capiz, ginpaslaw sang BHB-Central Panay (Jose Percival Estocada Jr Command) ang pag-atake sang 12th IB batuk sa isa sini ka yunit sa dulunan sang Barangay Artuz kag Barangay Apero sa banwa sang Tapaz sadtong Hulyo 19. Aktibo nga nakadepensa ang hangaway sang banwa batuk sa tropa sang militar paagi sa gilayon nga paghanda kag paglunsar sang kontra-atake.

“Sa kakibot sang militar, daw mga ido-buang sila nga patarasak nga pagpalupok,” suno sa BHB-Central Panay. Agud tabunan ang ila pagkalutos, naghimo-himo sang estorya ang 12th IB, kaupod ang 3rd ID, sang himo-himo nila nga kadalag-an batuk sa BHB.