Dako nga tampalo ha nawong han rehimen US-Marcos ngan mga upisyal han Armed Forces of the Philippines (AFP) an susrunod nga armado nga aksyon han Bagong Hukbong Bayan (BHB) ha pira nga mga prubinsya ha nasud. Kasunod ini han pahayag han rehimen nga “waray na grupo nga gerilya” hadton Hulyo ha ika-4 nga SONA.

Hadton Agosto 12, tulo nga sundalo kaupod an usa nga kapitan han 1st Scout Ranger Regiment ilarum han 203rd IBde an napatay ha ikaduha nga agway hito nga adlaw han BHB-Mindoro (Lucio de Guzman Command) ngan militar ha Barangay Lantuyang 2, Baco, Oriental Mindoro. Napusil ha ulo ngan namatay dayon an lider han yunit nga hi Capt. Marky John Alberto. Tulo nga pasista nga sundalo pa an nasamaran.

Pira kaadlaw antes hini, usa nga sundalo han 203rd IBde an napatay han BHB-Mindoro ha aktibo nga depensa kontra ha naatake nga yunit han kaaway ha Barangay Mangangan 2 ha Baco hadton Agosto 9 han aga.

Ha Quezon, ginpauranan han bala han usa nga yunit han BHB-Quezon (Apolonio Mendoza Command) an usa nga bag-o nga tukod nga kampo militar han 85th IB ha Barangay Cogorin Ibaba, Lopez hadton Agosto 2. Iginhimo han yunit an panhaharas han alas-7:30 han gab-i.

Iginkalipay han katawhan han Quezon an pag-atake tungod kay karuyag nira papagbatunon ha mga krimen an berdugo nga batalyon ngan mahatagan hustisya an ira mga biktima nga parag-uma.

Ha Capiz, ginpakyas han BHB-Central Panay (Jose Percival Estocada Jr Command) an pag-atake han 12th IB kontra ha usa hini nga yunit ha bawnderi han Barangay Artuz ngan Barangay Apero ha bungto han Tapaz hadton Hulyo 19. Aktibo nga nakapagdepensa an hukbo han katawhan kontra ha tropa han militar pinaagi han agap nga pangandam ngan paglansar hin kontra-atake.

“Ha kalas han militar, baga hin mga tuyaw nga ayam hira ha waray wantas nga pagpapabuto,” sigon ha BHB-Central Panay. Agud tahuban an ira kaperdihan, naghimo hin estorya an 12th IB, kaupod an 3rd ID, han hinimu-himo nira nga kadaugan kontra ha BHB.