Dakkel a tungpa iti rupa ti rehimen US-Marcos ken dagiti upisyal ti Armed Forces of the Philippines (AFP) ti agsasaruno nga armado nga aksyon ti New People’s Army iti sumagmamano a prubinsya iti pagilyan. Kasaruno daytoy ti pablaak ti rehimen nga “awanen ti grupo a gerilya” idi Hulyo iti maika-4 a SONA.

Idi Agosto 12, tallo a soldado kabilang ti maysa a kapitan ti 1st Scout Ranger Regiment iti uneg ti 203rd IBde ti napatay iti maikadwa a labanan iti NPA-Mindoro (Lucio de Guzman Command) ken militar iti didiay nga aldaw idiay Barangay Lantuyang 2, Baco, Oriental Mindoro. Napaltogan iti ulo ken dagus a natay ti lider ti yunit a ni Capt. Marky John Alberto. Tallo a pasista a soldado pay ti nasugatan.

Mano nga aldaw sakbay daytoy, maysa a soldado ti 203rd IBde ti napatay ti NPA-Mindoro iti aktibo a depensa laban iti rumaraut a yunit ti kabusor idiay Barangay Mangangan 2, Baco idi Agosto 9 ti agsapa.

Idiay Quezon, pinatudwan ti bala ti maysa a yunit ti NPA-Quezon (Apolonio Mendoza Command) ti maysa a kaitaktakder a kampo militar ti 85th IB idiay Barangay Cogorin Ibaba, Lopez idi Agosto 2. Impatungpal ti yunit ti panagharas iti alas-7:30 ti rabii.

Naragsakan ti umili ti Quezon iti panagatake ti soldados ti umili gapu ta kayat da a pagsungbaten ti berdugo a batalyon kadagiti krimen daytoy ken maikkan ti hustisya dagiti biktima da a mannalon.

Idiay Capiz, pinaay ti NPA-Central Panay (Jose Percival Estocada Jr Command) ti panagatake ti 12th IB laban iti maysa a yunit daytoy iti nagbeddengan ti Barangay Artuz ken Barangay Apero iti ili ti Tapaz idi Hulyo 19. Aktibo a nakadepensa ti hukbo ti umili laban iti tropa ti military babaen ti nasapa a panagsagana ken panagisayangkat ti kontra-atake.

“Gapu iti kigtot ti militar, kasla da mauyong nga aso a nagpalto-paltog,” segun iti NPA-Central Panay. Tapno kaluban ti pannakaabak da, naglubid ti istorya ti 12th IB ken 3rd ID iti balligi da laban iti NPA.