Padayon ang pagsulong sang malapad nga kontra-imperyalista nga mga kahublagan masa sa South Korea. Ginapanday sang pumuluyong Korean ang ila paghiliusa para lab-uton ang himpit nga demokrasya kag paghilway halin sa okupasyon sang US. Ang nagadako nga hublag nga ini kasunod sang lapnagon nga protesta sadtong ulihi nga bahin sang 2024 kag una nga kwarto sang 2025 batuk sa maka-US nga papet nga presidente sang pungsod. Sang nagligad nga mga semana, nagpatigayon ang mga grupo sa South Korea kag US sang mga porum, dalagkuan nga pagtililipon kag mga demonstrasyon agud palig-unon ang ila panindugan.

Martsa para sa kahilwayan

Sadtong Agosto 15, linibo ka South Korean ang nagmartsa sa Seoul, South Korea para igiit ang pagpalayas sa US kag mga base militar sini sa pungsod, pag-untat sang mga war games, kag paghimulos sini sa ekonomiya. Gintuon ang hublag sa ika-80 nga anibersaryo sang paghilway sang South Korea sadtong 1945 halin sa pagpangsakop sang imperyalistang Japan. Ginpamunuan ang protesta sang Korean Confederation of Trade Unions (KCTU).

Tuman ka dako nga katalagman ang imperyalismong US sa kabuhi kag kalinong sa Korean Peninsula, suno sa KCTU. Nakahibalo ang mga Koreano sang katalagman nga dala sang mga US-South Korea war games kasubong sang Ulchi Freedom Shield 2025, nga ginlunsar halin Agosto 18 kag magadugay tubtob Agosto 28.

Nagapati ang masang South Korean nga ginagamit ang mga war games nga ini para guyuron ang ila pungsod sa gyera sang US batuk sa kasumpong nga imperyalistang China. Magluwas sa South Korea, ginatos man ka mga war games ang ginlunsar sang US sa iban nga bahin sang Asia-Pacific, lakip na ang Pilipinas.

Nagmartsa ang mga grupo padulong sa Ganghwamun, Seoul kon diin nagapamulong-pulong si South Korean President Lee Jae Myung. Layo pa ginbanggaan na sila sang mga pulis.

Ginbatikos nila ang presidente sa natalana nga pakigsapol kay US President Donald Trump sa maabot nga Agosto 25. Nagapati sila nga ang sinapol magadala sang mas pa nga ganansya sa US kag kaimolon sa masang South Korean.

Ginaduso ni Trump sa South Korea ang tuigan nga pagbayad sini sang $10 bilyon para pondohan ang okupasyon sang US halin sa daan nga $1.13 bilyon sa idalum sang Special Measures Agreement. Ginaduso man niya nga dugangan ang gasto sa depensa padulong sa 5% sang gross domestic product (GDP) para ibakal sang armas halin sa US sa balor nga $87 bilyon. Ginaduso man ni Trump nga magpasugot si Myung sa bag-o nga kasugtanan kabahin sa pagpakat sang mga tropa sang US sa South Korea kontra China. Magapatuman man si Trump sang 25% nga taripa sa mga produkto sang pungsod.

Isa ka adlaw antes sini, nagprotesta ang mga grupo sa pinakadako nga dumuluong nga base militar sang US sa Camp Humphreys sa Pyeongtaek, Gyeonggi.

Sa US, ginpangunahan sang Koreano nga grupo nga Nodutdol ang mga demonstrasyon sa lain-lain nga estado sang US sadtong Agosto 15-16 agud ipanawagan ang pagpalayas sang US sa Korea.

People’s Summit for Korea

Masora 500 ka delegado halin sa US, South Korea kag mga pungsod sa Europe ang nagtambong sa pinakauna nga “People’s Summit for Korea: Towards National Liberation” sa New York City sadtong Hulyo 25-27. Ginpangunahan sang Nodutdol ang aktibidad nga ginpakigbahinan man sang mga grupo nga pungsodnon demokratiko nga Pilipino nga nakabase sa US kasubong sang Bayan-USA.

Ginpatawag ang pagtililipon bilang sabat sa pagsingki sang aktibidad militar sang US sa Korean Peninsula halin sang magsira ang mga negosasyon sa tunga sang US kag North Korea sadtong 2019. Halin sadtong 2022, mas nga nagdamo kag nagsingki ang mga US-South Korea war games. Nagpatigayon ang US Forces Korea sang 200 ka adlaw nga mga war games sa Korea sadtong 2023, kag 275 ka adlaw nga mga paghanas sadtong 2024.

Sa sulod sang duha ka adlaw nga programa, ginpaambit sang mga aktibista sa People’s Summit ang mga panan-awan kag pagtulun-an halin sa mga paghimakas sa Korean Peninsula para palayason ang mga base militar sang US, malinong nga tapuson ang Korean War, kag itib-ong ang mga demokratiko nga mga kinamatarung. Nagpaambit ang mga aktibistang grupo sa US sang ila mga pagtinguha nga pamatukan ang pagpasangkad sang badyet militar sang US kag iban pa nga patakaran ni Trump.