Padayon an pagbuylo han hiluag nga kontra-imperyalista nga kagiusan masa ha South Korea. Ginpapanday han katawhan Korean an ira pagkakaurusa agud kab-uton an hul-os nga demokrasya ngan katalwasan tikang ha okupasyon han US. Ini nga natikadako nga paggios kasunod han hiluag nga protesta hadton urhi nga parte han 2024 ngan syahan nga kwarter han 2025 kontra ha maka-US nga niyutiyo nga presidente han nasud. Ha naglabay nga mga semana, naghimo an mga grupo ha South Korea ngan US han mga porum, dagko nga katitirok ngan mga demonstrasyon agud padig-unon an ira paninindugan.

Martsa para ha katalwasan

Hadton Agosto 15, yukut-yukot nga South Korean an nagmartsa ha Seoul, South Korea agud ig-insister an pagpapaiwas ha US ngan mga base militar hini ha nasud, pagpaundang han mga war games, ngan paniniyupi hini ha ekonomiya. Igindungan an paggios ha ika-80 nga anibersaryo han katalwasan han South Korea hadton 1945 tikang ha pananakop han imperyalista nga Japan. Ginpamunuan an protesta han Korean Confederation of Trade Unions (KCTU).

Dako gud nga hulga an imperyalismo nga US ha kinabuhi ngan kamurayawan ha Korean Peninsula, sigon ha KCTU. Maaram an mga Korean ha kadelikaduhan nga dara han mga US-South Korea war games sugad han Ulchi Freedom Shield 2025, nga iginlansar tikang Agosto 18 ngan malastar tubtub Agosto 28.

Natuod an masa nga South Korean nga gin-gagamit ini nga mga war games agud danason an ira nasud ha gerra han US kontra ha karibal nga imperyalista nga China. Labot ha South Korea, gatus-gatos liwat nga mga war games an iginlalansar han US ha iba nga parte han Asia-Pacific, kaupod ha Pilipinas.

Nagmartsa an mga grupo ngadto ha Ganghwamun, Seoul diin namulong hi South Korean President Lee Jay Myung. Hirayo pa gin-ulang na hira han mga pulis.

Ginsukna nira an presidente ha nakatalaan hini nga pakig-erestorya kan US President Donald Trump ha tiarabot nga Agosto 25. Natuod hira nga an miting magdudul-ong la han dugang pa nga ganansya ha US ngan kakurian ha masa nga South Korean.

Iginduduso ni Trump ha South Korea an tinuig nga pagbabayad hini han $10 kabilyon agud pondohan an okupasyon han US tikang ha hadto $1.13 kabilyon ilarum han Special Measures Agreement. Iginduduso liwat niya nga dugngan an gastos ha depensa ngadto ha 5% han gross domestic product (GDP) agud igpalit han armas tikang ha US ha balor nga $87 kabilyon. Iginduduso liwat ni Trump nga abuyunan ni Myung an bag-o nga mga kasarabutan hiunong ha pagdeploy han mga tropa han US ha South Korea kontra China. Mag-iimponer liwat hi Trump han 25% nga taripa ha mga produkto han nasud.

Usa kaadlaw antes hini, nagprotesta an mga grupo ha pinakadako nga langyaw nga base militar han US ha Camp Humphreys ha Pyeongtaek, Gyeonggi.

Ha US, ginpangunahan han Korean nga grupo nga Nodutdol an mga demonstrasyon ha magkalain-lain nga estado han US hadton Agosto 15-16 agud ipanawagan an pagpapalayas han US ha Korea.

People’s Summit for Korea

Sobra 500 nga delegado tikang ha US, South Korea ngan mga nasud ha Europe an tinambong ha syahan nga “People’s Summit for Korea: Towards National Liberation” ha New York City hadton Hulyo 25-27. Ginpangunahan han Nodutdol an aktibidad nga ginpartisiparan liwat han mga grupo nga nasyunal-demokratiko nga Pilipino nga nakabase ha US sugad han Bayan-USA.

Iginpatawag an katitirok komo baton ha pag-grabe han panmilitar nga aktibidad han US ha Korean Peninsula tikang han magserra an mga negosasyon giutan han US ngan North Korea hadton 2019. Tikang hadton 2022, mas dumamo ngan pumintas an mga US-South Korea war games. Naghimo an US Forces Korea han 200 kaadlaw han mga war games ha Korea hadton 2023, ngan 275 kaadlaw han mga pagpapahiara hadton 2024.

Ha sakob han duha kaadlaw han programa, iginpasaro han mga aktibista ha People’s Summit an mga panan-aw ngan leksyon tikang ha mga pakigbisog ha Korean Peninsula agud palayason an mga base militar han US, mamurayaw nga humanon an Korean War, ngan ig-undong an mga demokratiko nga katungod. Nagpasaro an mga grupo han aktibista ha US han ira mga panalinguha nga tipahan an pagpapahiluag han panmilitar nga badyet han US ngan iba pa nga palisiya ni Trump.