Agtultuloy ti panagdalluyon ti nalawa nga anti-imperyalista a tignay masa iti South Korea. Panpandayen ti umili a Korean ti panagkaykaysa da tapno gun-oden ti naan-anay a demokrasya ken pannakawayawaya manipud iti okupasyon ti US. Daytoy a dumakdakkel a tignay ket kasaruno ti nalawa a protesta idi maudi a paset ti 2024 ken umuna a kwarto ti 2025 laban iti maka-US nga aso-aso a pangulo ti pagilyan. Kadagiti napalabas a lawas, dagiti grupo idiay South Korea ken US ket nangangay kadagiti porum, dadakkel a taripnong ken demonstrasyon tapno papigsaen ti pangngeddeng da.

Martsa para iti wayawaya

Idi Agosto 15, rinibo a South Korean ti nagmartsa idiay Seoul, South Korea tapno irupir ti panagpadisi iti US ken dagiti base militar ditoy pagilyan, panagsardeng dagiti war games ken panaggundaway daytoy iti ekonomya. Nairana ti tignay iti maika-80 anibersaryo ti pannakawayawaya ti South Korea idi 1945 manipud iti panagsakop ti imperyalista a Japan. Ti protesta ket indaulwan ti Korean Confederation of Trade Unions (KCTU).

Ti imperyalismo a US ket nakadakdakkel a pangta iti biag ken kapya iti Korean Peninsula, segun iti KCTU. Ammo dagiti Korean ti peggad nga awit dagiti US-South Korea war games kas ti Ulchi Freedom Shield 2025, a naisayangkat manipud Agosto 18 ken agbayag agingga Agosto 28.

Mamati ti masa a South Korean a maar-aramat dagitoy a war games tapno guyuden ti pagilyan da iti gera ti US iti kabusor daytoy nga imperyalista a China. Malaksid iti South Korea, ginasut met a war games ti isaysayangkat ti US iti sabali a paset ti Asia-Pacific, kabilang ti Pilipinas.

Nagmartsa dagiti grupo agturong idiay Ganghwamun, Seoul nu sadinno a nagbitla ni South Korean President Lee Jae Myung. Adayo da pay ket hinarang isudan dagiti pulis.

Binabalaw da ti pangulo iti naituding a pannakimiting daytoy ken US President Donald Trump inton Agosto 25. Mamati da a ti miting ket agitunda laeng ti dakdakkel pay a ganansya ti US ken panagrigat ti masa a South Korean.

Idurduron ni Trump idiay South Korea ti tinawen a panagbayad daytoy ti $10 bilyon tapno pondoan ti okupasyon ti US manipud iti dati a $1.13 bilyon iti uneg ti Special Measures Agreement. Idurduron na met a nayunan ti gastos iti depensa agturong ti 5% ti gross domestic product (GDP) tapno igatang ti armas manipud iti US iti gatad nga $87 bilyon. Idurduron met ni Trump nga anamongan ni Myung dagiti baro a katulagan kanaig iti panangipakat kadagiti tropa ti US idiay South Korea kontra China. Agipataw met ni Trump ti 25% taripa kadagiti produkto ti pagilyan.

Maysa nga aldaw sakbay daytoy, nagprotesta dagiti grupo iti kadakkelan a gangannaet a base militar ti US iti Camp Humphreys idiay Pyeongtaek, Gyeonggi.

Idiay US, inyuna ti Korean a grupo a Nodutdol dagiti demonstrasyon iti nadumaduma nga estado ti US idi Agosto 15-16 tapno iyawag ti panangpadisi iti US idiay Korea.

People’s Summit for Korea

Nasurok 500 delegado manipud US, South Korea ken dagiti pagilyan iti Europe ti dimmar-ay iti kaunaan a “People’s Summit for Korea: Towards National Liberation” idiay New York City idi Hulyo 25-27. Ti aktibidad ket inyuna ti Nodutdol a dinar-ayan met dagiti grupo a nailyan-demokratiko a Pilipino a nakabase idiay US kas ti Bayan-USA.

Ti taripnong ket naipaawag kas sungbat iti panagkaro ti aktibidad militar ti US idiay Korean Peninsula manipud agserra dagiti negosasyon iti baet ti US ken North Korea idi 2019. Manipud idi 2022, palalo nga immadu ken kimmaro dagiti US-South Korea war games. Nagiyaramid ti US Forces Korea ti 200 aldaw a war games idiay Korea idi 2023, ken 275 araw a panagsanay idi 2024.

Iti uneg ti dua nga aldaw a programa, imbingay dagiti aktibista iti People’s Summit dagiti pannirigan ken adal manipud kadagiti dangadang iti Korean Peninsula tapno papanawen dagiti base militar ti US, natalinaay a gibusan ti Korean War ken itandudo dagiti demokratiko a karbengan. Nagibingay dagiti aktibista a grupo idiay US kadagiti ganetget da a supyaten ti panagpalawa ti badyet militar ti US ken dadduma pay a patakaran ni Trump.