Kas panangrambak iti maika-61 anibersaryo ti Kabataang Makabayan (KM) idi Nobyembre 30, nagisayangkat ti innadal, asembliya, rali ken dadduma pay nga aktibidad dagiti balangay daytoy. Daytoy ket panangikagumaan met ti KM tapno paregtaen ti tignay a limed iti intar dagiti kabataan, tapno papigsaen ti pannakipaset da iti rebolusyonaryo a tignay.

Pappapigsaen ti KM ti bagbagi na bayat nga iyun-una dagiti kabataan a Pilipino dagiti nasaknap a protesta kontra korapsyon iti intero a pagilyan manipud pay Setyembre. Al-allukoyen ti KM dagiti kabataan nga ituloy a papigsaen ti pukkaw ken panaglaban da iti korapsyon ken burukrata kapitalismo. Kagiddan daytoy, ilawlawag da a ti pudno a panagbalbaliw ket magun-od laeng dagiti kabataan ken umili babaen ti gubat ti umili.

Adalen ti gubat ti umili

Idiay Manila, maysa a balangay ti KM iti maysa a kolehiyo ti nagtaripnong tapno talantanen ti sinurat ni Ka Amado Guerrero a Dagiti Partikular a Kagagalad ti Gubat ti Umili Tayo. Pinili da ti artikulo tapno maadal ti gubat ti umili nga isaysayangkat ti New People’s Army (NPA), maawatan dagiti partikularidad daytoy ken maamwan ti pamuspusan ti panangiyabante ditoy manipud iti maysa a tukad agturong iti maysa pay.

“Napauneg daytoy ti pannakaawat ko iti gubat ti umili,” panangibingay ni Ka Sharon, baro a rekrut ti KM. “Iti laksid ti dasig a nagtaudak, ad-adda a magagaranak tatta a makitipon iti sumaruno a grupo dagiti estudyante a makipaset iti rebolusyonaryo nga integrasyon,” segun ken Ka Len.

Sangsangkamaysa met a nagbuya dagiti kameng ti KM ti dokumentaryo ti Sine Proletaryo a Buhay Komunista 2, nagadal da ti rebolusyonaryo a kanta a Pagbati, ken nagbasa da ti daniw nga Ang Gerilya Ay Tulad Ng Makata ni Ka Jose Maria Sison. Nagtalantan met ti balangay seknan iti panagpartuat ti rebolusyonaryo a sining ken ti panagpada daytoy iti sining ti gerilya a pannakigubat.

Nagiyebkas ti optismo ti upisyal ti balangay a ni Ka Ces iti positibo nga ibunga ti nairuswat da a taripnong. “Sapay koma ta daytoy a panagtatalantan ket mangted kadatayo ti kabaelan nga ad-adda pay a tenneben ti bagbagi tayo iti tay-ak ti ideolohiya,” kunana. Ad-adda pay kano a kasapulan daytoy dagiti kameng ti KM iti sango ti umir-irteng a pangpulitika a sitwasyon iti sidong ti rehimen Marcos.

Dagiti rali, asembliya ken OP-OD ti KM

Iti laksid ti pasista a panagipawil ti rehimen, mapangngeddeng a nairuswat dagiti balangay ti KM dagiti rali, asembliya ken operasyon pinta-operasyon dikit (OP-OD) iti sumagmamano a lugar. Plinano da a nalaing dagitoy tapno masigurado ti kinatalged iti seguridad ti tunggal aktibidad.

Idi Nobyembre 27 ken 28, ken Disyembre 5, nagisayangkat ti rali dagiti balangay ti KM idiay Quezon City ken Manila. Awit da ti bandera ti KM, immawag dagiti kabataan ken umili a Pilipino nga agkameng iti NPA ken idaton ti pigsa, laing ken kabaelan iti panangiyabante ti gubat ti umili.

Idiay Metro Manila, tallo nga asembliya ti KM ti naiyaramid idi Nobyembre. Kabayatanna, nakaisayangkat ti OP-OD dagiti balangay ti KM iti De La Salle University (DLSU)-Manila, DLS-College of St. Benilde, University of the Philippines (UP)-Manila ken Polytechnic University of the Philippines idiay Manila. Inkasa met daytoy ti KM iti UP Los Baños, iti Calamba City idiay Laguna ken iti UP Cebu. Idiay Canada, inyulat met ti maysa a balangay ti KM a pakaibilangan dagiti kabataan a Pilipino a migrante ken diyaspora ti panagisayangkat ti OP-OP.

Agsusumbangir met ti pablaak dagiti balangay ti KM tapno rambakan ti anibersaryo daytoy. Pinadayawan da ni Ka Joma, pangulo a nangipundar ti KM, para iti kaban ti nabaknang nga adal nga imbati na para kadagiti kabataan iti panangiyabante ti rebolusyon a Pilipino. Kabilang kadagiti nagiruar ti pablaak dagiti balangay daytoy iti rehiyon ti Ilocos, Metro Manila, Negros Island, Panay, Laguna, Cavite ken Cebu.

“Iti pannakipagbiag tayo iti masa, napinget a tenneben tayo ti takder tayo. Aw-awagan datayo a rumuk-at manipud iti komportable a biag ken nakairuaman … ad-adda a napatpateg ti sakripisyop tapno gibusan ti bulok a sistema,” pablaak ti KM.