Komo pagsalin-urog ha ika-61 nga anibersaryo han Kabataang Makabayan (KM) hadton Nobyembre 30, naglansar hin pag-aram, asembleya, rali ngan iba pa nga aktibidad an mga tsapter hini. Paningkamot liwat ini han KM para parayhakon an sikreto nga kagiusan ha ranggo han kabatan-unan, agud pakusgon an pagpartisipar nira ha rebolusyunaryo nga kagiusan.

Ginpapakusog han KM an kalugaringon samtang nangunguna an mga kabatan-unan nga Pilipino ha hiluagan nga mga protesta kontra korapsyon ha bug-os nga nasud tikang pa Septyembre. Gin-aaghat han KM an mga kabatan-unan nga padayon nga pakusgon an ira guliat ngan pag-ato ha korapsyon ngan burukrata kapitalismo. Kadungan hini, ginkaklaro nira nga an tinuod nga pagbabag-o makakab-ot la han mga kabatan-unan ngan katawhan pinaagi han gerra han katawhan.

Adman an gerra han katawhan

Ha Manila, usa nga tsapter han KM ha usa nga kolehiyo an nagtirok agud talakayon an sinurat ni Ka Amado Guerrero nga An Mga Partikular nga Kinaiya han Aton Gerra han Katawhan. Ginpili nira an dokumento agud mapag-adman an gerra han katawhan nga ginlalansar han Bagong Hukbong Bayan (BHB), masantop an mga partikularidad hini ngan mahibaruan an pamaagi han pagpapasulong hini tikang ha usa nga balitang ngadto ha usa pa.

“Napahilarum hini an pagsantop ko ha gerra han katawhan,” pagpapasaro ni Ka Sharon, bag-o nga rekrut ha KM. “Ha luyo han klase nga gintikangan ko, mas ruruyagon ako yana nga pumartisipar ha masunod nga grupo han mga estudyante nga mapartisipar ha rebolusyunaryo nga integras-yon,” sigon kan Ka Len.

Urupod liwat nga nagkita an mga membro han KM han dokumentaryo han Sine Proletaryo nga Buhay Komunista 2, nag-aram han rebolusyunaryo nga kanta nga Pagbati, ngan nagbasa han luwa nga An Gerilya Sugad han Paragsiday ni Kasamang Jose Maria Sison. Nagdiskusyon liwat an tsapter hiunong ha paghimo han rebolusyunaryo nga arte ngan an pagkakapareho hini ha arte han ginerilya nga pakiggerra.

Nagpahayag han optismo an upisyal han tsapter nga hi Ka Ces ha positibo nga igbubunga han ira nahilansar nga katitirok. “Hinaot matagan kita hini nga mga talakayan hin kapas nga labaw pa nga pandayon an aton mga kalugaringon ha natad han ideolohiya,” sering niya. Mas ginkikinahanglan kuno ini han mga membro han KM atubangan han natikapintas nga pampulitika nga sitwasyon ilarum han rehimen Marcos.

Mga rali, asembliya ngan OP-OD han KM

Ha luyo han pasista nga panmuypoy han rehimen, mapagdesisyon nga nahilansar han mga tsapter han KM an mga rali, asembleya ngan operasyon pinta-operasyon dikit (OP-OD) ha pira nga lugar. Maupay nira nga ginplano ini agud maseguro an katalwasan ha seguridad han kada aktibidad.

Hadton Nobyembre 27 ngan 28, ngan Disyembre 5, naglansar hin rali an mga tsapter han KM ha Quezon City ngan Manila. Dara an bandera han KM, nanawagan hira ha mga kabatan-unan ngan katawhan Pilipino nga umapi ha BHB ngan ighalad an kusog, kabaltok ngan kapas ha pagpapasulong han gerra han katawhan.

Ha Metro Manila, tulo nga asembleya han KM an nahimo hadton Nobyembre. Samtang, nakaglansar hin OP-OD an mga tsapter han KM ha De La Salle University (DLSU)-Manila, DLS-College of St. Benilde, University of the Philippines (UP)-Manila ngan Polytechnic University of the Philippines ha Manila. Ginlansar liwat ini han KM ha UP Los Baños, ha Calamba City ha Laguna, ngan ha UP Cebu. Ha Canada, ginreport liwat han usa nga tsapter han KM nga ginkakaapihan han mga kabatan-unan nga Pilipino nga migrante ngan diaspora (binalhin tikang ha tuna nga gindak-an) an paglalansar han OP-OD.

Paluyu-luyo liwat an pamamahayag han mga tsapter han KM agud igsalin-urog an anibersaryo hini. Ginsaludaran nira hi Ka Joma, an tagapangulo nga tagapagtukod han KM, para ha baul-karikuhan nga leksyon nga ginbilin niya para ha mga kabatan-unan ha pagpapasulong han rebolusyon Pilipino. Kalakip ha mga nagpagawas han pahayag an mga tsapter hini tikang ha rehiyon han Ilocos, Metro Manila, Negros Island, Panay, ngan ha Laguna, Cavite ngan Cebu.

“Ha aton pag-integreyt ha masa, maisugon naton nga pandayon an aton panindugan. Gintatawag kita nga umalinggawas na ha aton komportable nga kinabuhi ngan higwaos… labaw nga may pulos an sakripisyo agud tapuson an dunot nga sistema,” pahayag han KM.