Iti hukbo ti umili, napateg ti panagadal tapno mamuli dagiti mannakigubat kas proletaryo a rebolusyonaryo.

Idiay Luntian, maysa a yunit ti NPA idiay Southern Tagalog, sigsiguraduen ti komite ti Partido iti uneg daytoy a maingatngato ti tukad ti teoretiko a pannakaawat iti Marxismo-Leninismo-Maoismo. Nairut nga isilsilpo daytoy ti teorya iti kongkreto a rebolusyonaryo a praktika ti yunit.

“Ti nagbalin a karit iti panangipatungpal ti trabaho nga edukasyon iti hukbo ti umili ket ti sangsangwen a sitwasyon militar,” kuna ni Ka Reymundo, kumander ti yunit. Dandani makatawen a tuloy-tuloy ti maniobra ti Luntian gapu kadagiti pinairteng nga operasyon ti Armed Forces of the Philippines. Immadu ti inpakat a tropa daytoy iti larangan gerilya. Pinairteng met daytoy ti panagaramat ti moderno nga armas ken teknolohiya.

Panangparegta ti edukasyon a pangpartido

Nakaturong ti kampanya nga edukasyon ti Luntian iti pakasaritaan ken kadagiti basaran a panagamiris ken linya ti Partido. Panagtungpal daytoy iti praktikal a tarabay iti intuding ti Partido a tignay panagilinteg. Manipud 2024, nairuswat iti yunit dagiti regular ken espesyal a kurso tapno sublian a pagadalan dagiti kamali ken pagkapuyan, ken tenneben dagiti kakadwa kas komunista. Kabilang kadagiti kurso ti Burukratismo, Kumandismo ken Liberalismo, Ilinteg dagiti Kamali ken Balbaliw nga Itakder ti Partido, Komunista, Agbalin nga Abante nga Elemento ti Proletaryado, Konstitusyon ti Partido ken Programa para iti Demokratiko a Rebolusyon ti Umili.

Dagiti innadal ket gidgiddanan ti programa a Kolektibo a Basa ken Kolektibo a Tinnalantan (KBKT) kadagiti dokumento a maadal. Daytoy ket tapno mapamilyarisa dagiti agad-adal kadagiti linaon dagiti kurso. Naallukoy daytoy dagiti kakadwa a sigud nga awanan hilig iti panagbasa ken tinnalantan. Nu maliwayan, mismo a dagiti mannakigubat ti agdamag: “Awan kadi ti KBKT tayo?”

Nagbalin met nga inaldaw nga aktibidad ti Rebokabularyo. Maiyam-ammo ken maipalpalawag ditoy nga aktibidad dagiti nadadagsen a termino, linteg ken signipikante a personahe nga adda kadagiti topiko iti inaldaw.

Tunggal dumteng, dagus a matalantan dagiti mensahe ti Komite Sentral ken Komite ti Rehiyon kadagiti anibersaryo ti Partido ken Hukbo. Dardar-ayan dagitoy dagiti kadre ken kameng ti Partido iti nadumaduma a tukad, ken uray ti rebolusyonaryo a masa.

Mangpunpunta kadagiti pagkapuyan

Dagiti innadal ket nairut a maisilsilpo iti kongkreto a rebolusyonaryo a praktika dagiti kakadwa. Maad-adaw dagiti ehemplo manipud iti aktwal a kapadasan ti yunit ken praktika dagiti kakadwa.

Gapu ditoy, dagiti innadal ket nagbalin a pagayusan ti unipikasyon dagiti panagtasa ken panaglagom kadagiti pakaseknan a sangsangwen ti yunit.

Maguyguyugoy dagiti kakadwa a sublian ti bukod a rebolusyonaryo a praktika iti panawen dagiti innadal ken aramaten daytoy a tarabay iti panaglagom iti bagi. Iti panawen dagiti panagtatalantan, naluklukay a maisangsango dagiti kakadwa dagiti kamali ken pagkapuyan dagiti indibidwal.

“Adu a daras a mapuntaan iti innadal, dagiti rumbeng nga aramiden, ken nu anya a talaga ti kayat a sawen ti sipupuso a panagserbi,” segun iti maysa nga estudyante iti panagtasa ti innadal a nangtalantan kadagiti pamuspusan nu kasano nga agpakalaing kas proletaryado.

Panangrimbaw iti empirisimo

Ti panangingato ti praktika iti teoretiko a tukad dagiti kakadwa ket tulbek iti panangrimbaw iti empirisismo. Daytoy ket tarabay kadagiti panagtasa ken panaglagom. Panggep daytoy nga agitunda ti nangatngato a rebolusyonaryo a praktika.

Kadagiti innadal, maal-allukoy dagiti kakadwa nga agbalin a mas kritikal iti bagi ken iti dadduma a kakadwa seknan kadagiti kamali nga istilo ti panagtrabaho. Dakkel ti tulong dagitoy iti panangrimbaw ti adu nga indibidwal ken kolektibo a pagkapuyan ti yunit. Tulbek met dagitoy iti panangrisut kadagiti risiris nga agtataud iti agduduma ng ideya, praktika ken istilo.

“Adda dagiti risiris iti panangtudo ti usto ken kamali iti praktika, panagraira ti empirisismo ken indibidwalismo, a tuloy-tuloy a rimrimbawan ti yunit,” segun ken Ka Reymundo. Iti panagkita na, addan ti panagdur-as kadagitoy a risiris. In-inuten nga agbalbaliw dagiti kamali a nakairuaman ken praktika dagiti kakadwa. Nair-iruten ti yunit iti panangipatungpal kadagiti nagkaykaysaan,” kunana.