Balbaliw a nagmartsa iti kalsada idi Nobyembre 30 ti rinibo a Pilipino iti nadumaduma a paset ti pagilyan tapno agprotesta laban iti maibutbutaktak a nasaknap a korapsyon iti gubyerno. Kagiddan daytoy ti pananglagip iti maika-162 a kasangay ti ama ti panagrukwas ti Pilipino a ni Andres Bonifacio.

Iti didiay nga aldaw, umaw-aweng dagiti awag ti umili manipud iti panangpasungbat iti amin a karaman iti kunniber, panangduprak kadagiti dinastiya iti pulitika ken panangpaibbat iti poder iti presidente a ni Ferdinand Marcos Jr, bise presidente a ni Sara Duterte, ken dadduma pay a kunniber nga upisyal.

Iti panangiyuna ti Kilusang Bayan Kontra Kurakot (KBKK), nasurok 20,000 ti nagtitipon iti Luneta Park idiay Manila para iti protesta a Baha sa Luneta 2.0. Ginandat ti rehimen Marcos nga idiskaril ti tignay iti panangiparit kadakwada nga agtitipon ken agisayangkat ti programa. Saan a nagawidan ti panangsabotahe ti pukkaw ti umili para iti panagsungbat dagiti nakabasol ken hustisya.

Dimmar-ay iti tignay ti nadumaduma a grupo, pwersa ken sektor kabilang dagiti mangmangged, mannalon, nakurapay iti syudad, estudyante, babbai ken tao’t simbaan. Kas ti immuna nga indeklara ti KBKK, silulukat nga inawat daytoy ti nadumaduma a panawagan dagiti grupo karaman ti panangpaikkat kada Marcos ken Duterte ken panangitakder ti maysa a transition council.

Rinibo met ti nagtitipon iti protesta a Trillion Peso March 2.0 a naangay idiay EDSA, Quezon City. Inyuna daytoy ti Simbaan Katolika ken dadduma pay a grupo ken partido a mangbukbukel iti Trillion Peso March Movement (TPMM).

Sakbay dagiti tignay, inkagumaan ngem napaay ti KBKK a makitipon iti TPMM para iti maysa a protesta idiay Metro Manila. Saan nga umanamong dagiti grupo iti TPMM, partikular ti Akbayan, a naparang nga awiten dagiti grupo iti KBKK dagiti panawagan a direkta nga mangitaltalmeg ken Marcos iti pannakairaman iti sistemiko a korapsyon.

Iti ruar ti Metro Manila, nagtignay dagiti grupo nga alyado ti KBKK idiay Baguio City, La Union, Ilocos Sur, Ilocos Norte, Isabela, Tarlac, Calamba City, Cavite, Oriental Mindoro, Legazpi City, Naga City, Antique, Capiz, Aklan, Iloilo City, Bacolod City, Cebu City, Tacloban City, Davao City, Cagayan de Oro City ken idiay General Santos City. Naiyulat met dagiti misa, taripnong ken martsa dagiti papadi ken lider ti simbaan, kadwa da dagiti umili iti saan a bumaba iti 86 a diyosesis iti intero a pagilyan.

Iti ruar ti Pilipinas, dumanon iti dandani 2,000 Pilipino a migrante ken dagiti alyado iti 30 syudad iti 23 a pagilyan ti nakipaset iti sangalubongan a tignay kontra korapsyon. Dagiti protesta ket indauluan ti kabukbukel laeng a KBKK-Global.

Step down kontra step up

Ad-adda a limmatak ti panagduduma iti panawagan dagiti grupo kanaig iti panangpasungbat ken Marcos mismo. Nagkedked ti Akbayan, maysa kadagiti mangiyun-una iti TPMM, a bigbigen ti kinakaro ti korapsyon ni Marcos, nu di ket immawag pay daytoy nga ag-“step-up” isuna iti pananglaban iti korapsyon. Bin-ig a kaniwas daytoy iti takder ti KBKK a dakkel ti sungsungbatan ni Marcos iti sistematiko a kunniber iti gubyerno.

Immawag met ti Akbayan ken Marcos nga aramiden a prayoridad ti “anti-dynasty bill,” uray pay ti pamilya daytoy ti kabulokan a dinastiya iti pulitika.

“Step down” (bumaba kan) ti awag ti Bagong Alyansang Makabayan (Bayan, paset ti KBKK) ken Marcos. Daytoy ket tapno maikkan dalan ti maysa a nawaya ken naanep nga imbestigasyon laban iti korapsyon ken sangwen ti sungsungbatan na kadagiti krimen laban iti umili a Pilipino.

Kalpasan ti protesta ti KBKK idiay Luneta Park, indauluan ti Bayan ti martsa agturong idiay Mendiola tapno singiren ni Marcos. Inyawag dagiti grupo ti panagibbat da Marcos ken Duterte. Iyaw-awag da a sukatan isuda ti maysa a national transition council. Kas ti napalabas, hinarangan isuda ti rinibo a pulis ken naiduron da nga agprograma iti batog ti University of the East iti Recto Avenue. Nakimartsa iti Bayan dagiti pwersa ti Partido Lakas ng Masa, Bukluran ng Manggagawang Pilipino ken Sanlakas.

Iti panagleppas ti programa iti Recto Avenue, dinadael dagiti raliyista ti effigy ni Marcos a nakasuot ti korona ken sash a pintado ti bandera ti US.