Balligi nga inangay ti National Democratic Front of the Philippines (NDFP) ti maikalima nga internasyunal a teoretikal a kumperensya nga addaan tema a Pasismo iti Maika-21 Siglo iti Puseg dagiti Pagilyan nga Imperyalista. Naaramid daytoy manipud Nobyembre 28 agingga 29 idiay Utrecht, The Netherlands.

Ti kumperensya ket dinar-ayan ti 125 indibidwal manipud iti 71 partido komunista ken organisasyon ti masa. 20 kadagitoy a partido ken grupo ti nagisumite kadagiti kontribusyon a natalantan iti kumperensya. Ti kumperensya ket insagut ti NDFP iti lagip ni Ka Louie Jalandoni, proletaryo nga internasyunalista ken martir ti rebolusyon a Pilipino.

Ti 2-aldaw a kumperensya ket nagbatay iti teoretikal ken istorikal a panangawat iti pasismo manipud kadagiti sinurat da Lenin, Stalin ken Mao. Pinasingkedan daytoy ti kayat a sawen ti pasismo segun iti konsepto ni Georgi Dimitrov, maysa a komunista a Bulgarian a nagserbi a pangulo ti Communist International idi dekada 1930. Kuna ni Dimitrov, ti naindasigan a galad ti pasismo ket aglanglanga ti “naparang a diktadura ti kakarwan a reaksyunaryo, kakarwan a sobinista ken kakarwan nga imperyalista nga elemento ti kapitalismo iti pinansya.” Galad ti monopolyo kapitalismo a naidasay iti krisis ti kina-kontra-komunista, ultra-reaksyunaryo ken kinaranggas iti panangipawil iti dasig a mangmangged.

Natalantan iti kumperensya ti balbaliw a panagbwelo ti pasismo gubway ti sangalubongan kapitalista a sistema, nangruna kalpasan ti krisis iti pinansya idi 2008-2009. Tinudo da dagiti manipestasyon ti pasismo ken pasisasyon kadagiti imperyalista a pagilyan a nakaturong iti sumagannad: 1) pasisasyon ti burgis nga estado; 2) panagaramat ti AI (artificial intelligence) ken abante a teknolohiya tapno pawilan ken ad-adda a gundawayan ti dasig a mangmangged; (3) panagkaro ti sobinismo ken dagiti reaksyunaryo nga ideolohiya ken 4) panagtaud dagiti pasista a tignay masa.

Ti pasisasyon ti burgis nga estado ti proseso nu sadinno a malablabusan ti burgis a liberal a demokrasya ken maiparparang ti nakarkaro nga awtoritaryan ken dagiti represibo nga addang agturong ti naparang a panagari ti teror.

Naaddaan ti naregta a panagbibinninglay panggep ti interaksyon ti pasismo kadagiti imperyalista a pagilyan ken kadagiti neokolonya, nu sadinno a basaran a galad ti estado ti pasismo. Kadagiti malakolonya nga umuna a subsuboken ken ipatpatungpal ti imperyalismo dagiti eksperimento iti panagaramat ti terorismo ti estado. Ar-aramaten daytoy ti programa a kontra-insurhensya, ayuda a militar ken manipulasyon ken nararanggas a panagipawil kadagiti umili.

Adda ti partikular a panagtalantan iti naisangsangayan a kapadasan ti Ireland, a mangitudtuding iti bagi na kas kapitalista a malakolonya, ken Palestine, maysa nga okupado a pagilyan. Kadagiti tignay a mamagwayawaya kadagitoy a pagilyan, agtipon ti anti-pasista ken anti-imperyalista a panaglaban.

Tinudo ti kumperensya ti panangitakder kadagiti “palaban nga organisasyon” kas madagdagus a rebbengen ti proletaryo tapno batogan ti binukel dagiti pasista a tignay a “palaban nga organisasyon.” Nangted dagiti kakadwa manipud kadagiti imperyalista a pagilyan kadagiti ehemplo dagiti kongkreto nga anti-pasista a paglaban.

Inlanad da dagiti adal manipud iti gawaing masa da, kadagiti adbokasiya, panangsalaknib iti bagi ken panagorganisa iti uneg dagiti unyon, partido, organisasyon ken tignay. Tinalmegan da ti pagkasapulan ti panangitakder ti nalawa nga anti-pasista a nagkaykaysa a prente dagiti mangmangged ken dadduma pay a demokratiko a sektor. Kunada, kaipapanan ti panangitakder iti daytoy nga alyansa ti panangilaksid ti sektaryanismo ken konserbatismo, bayat a managbantay kadagiti sosyal demokrata ken dadduma pay nga oportunista nga elemento. Ammo da nga ti panangidaulo ti proletaryado ket integral iti nagkaykaysa a prente iti panangisilpo kadagiti dangadang ti masa iti panangikkat iti ramut ti pasisasyon. Daytoy a panangidaulo ket tulbek iti panangduprak iti monopolyo kapitalismo ken diktadura ti burgesya.

Dagiti delegado manipud kadagiti imperyalista a pagilyan ket kumbinsido a kasapulan nga itakder dagiti natibker a partido ti mangmangged. Kasapulan nga ipatungpal dagiti operasyon a nakalemmeng, kakumbina dagiti trabaho a naparang, tapno makabayag iti sango dagiti pasista nga atake ken gun-oden dagiti balligi para iti dasig a mangmangged. Kasapulan met nga ad-adda a palawaen ti panagkaykaysa kadagiti dangadang iti puseg dagiti pagilyan nga imperyalista ken kadagiti malakolonya.

Naggibus ti kumperensya iti ababa a kultural a programa nga addaan tema a “Manipud iti Palestine agingga Pilipinas, rebbeken ti makina a panggubat ti US,” kagiddan ti pananglagip iti International Day of Solidarity with the People of Palestine.