Bilang pagsaulog sang ika-61 nga anibersaryo sang Kabataang Makabayan (KM) sadtong Nobyembre 30, naglunsar sang pagtuon, asembliya, rali kag iban pa nga aktibidad ang mga tsapter sini. Pagtinguha man ini sang KM nga papagsikon ang kahublagan likom sa kubay sang mga pamatan-on, agud pabaskugon ang pagpakigbahin nila sa rebolusyonaryong kahublagan.

Ginpabaskog sang KM ang kaugalingon samtang nagapanguna ang mga pamatan-on Pilipino sa lapnagon nga mga protesta kontra korapsyon sa bug-os nga pungsod halin pa sang Septyembre. Gina-engganyo sang KM ang mga pamatan-on nga padayon nga pabaskugon ang ila singgit kag pakigbato sa korapsyon kag burukrata kapitalismo. Kadungan sini, gina-athag nila nga ang matuod nga pagbag-o maagum lang sang mga pamatan-on kag pumuluyo paagi sa inaway banwa.

Tun-an ang inaway banwa

Sa Manila, isa ka tsapter sang KM sa isa ka kolehiyo ang nagtipon para talakayon ang sinulat ni Ka Amado Guerrero nga Ang mga Partikular nga Kinaiya sang Aton Inaway Banwa. Ginpili nila ang sinulat agud tun-an ang inaway banwa nga ginalunsar sang Bagong Hukbong Bayan (BHB), mahangpan ang mga partikularidad sini kag mahibaluan ang mga pamaagi sang pagpasulong sini halin sa isa ka halintang padulong sa isa pa.

“Napadalum sini ang paghangup ko sa inaway banwa,” pagpaambit ni Ka Sharon, bag-o nga rekrut sa KM. “Sa pihak sang sahi nga ginhalinan ko, mas nagakalangkag ako subong nga magpakigbahin sa masunod nga grupo sang mga estudyante nga makigbahin sa rebolusyonaryong intergrasyon,” suno kay Ka Len.

Ululupod man nga nagtan-aw ang mga myembro sang KM sang dokumentaryo sang Sine Proletaryo nga Buhay Komunista 2, nagtuon sang rebolusyonaryong ambahanon nga Pagbati (Panamyaw), kag nagbasa sang binalaybay nga Ang Gerilya Ay Tulad Ng Makata (Ang Kabuhi Kaangay sang Mamamalaybay) ni Kaupod Jose Maria Sison. Nagtalakayan man ang tsapter tuhoy sa pagpatuhaw sang rebolusyonaryong literatura kag ang pagkaanggid sini sa gerilyang pakig-away.

Nagpahayag sang optimismo ang opisyal sang tsapter nga si Ka Ces sa positibo nga ibunga sang ila nalunsar nga pagtipon. “Kabay nga mahatagan kita sang ikasarang sa mga talakayan nga ini nga mas pa pandayon ang aton mga kaugalingon sa patag sang ideolohiya,” suno sa iya. Mas kuno nga kinahanglan ini sang mga myembro sang KM sa atubang sang nagasingki nga pangpulitika nga sitwasyon sa idalum sang rehimen Marcos.

Mga rali, asembliya kag OP-OD sang KM

Sa pihak sang pasistang pagpangsumpo sang rehimen, desaysibo nga nalunsar sang mga tsapter sang KM ang mga rali, asembliya kag operasyon pinta-operasyon dikit (OP-OD) sa pila ka lugar. Maayo nila nga ginplano ang mga ini agud maseguro ang kaluwasan sa seguridad sang kada aktibidad.

Sadtong Nobyembre 27 kag 28, kag Disyembre 5, naglunsar sang rali ang mga tsapter sang KM sa Quezon City kag Manila. Bitbit ang mga bandera sang KM, nagpanawagan sila sa mga pamatan-on kag pumuluyong Pilipino nga magpatapo sa BHB kag ihalad ang kusog, kaalam kag ikasarang sa pagpasulong sang inaway banwa.

Sa Metro Manila, tatlo ka asembliya sang KM ang natigayon sadtong Nobyembre. Samtang, nakalunsar sang OP-OD ang mga tsapter sang KM sa De La Salle University (DLSU)-Manila, DLS-College of St. Benilde, University of the Philippines (UP)-Manila kag Polytechnic University of the Philippines sa Manila. Ginkasa man ini sang KM sa UP Los Baños, sa Calamba City sa Laguna, kag sa UP Cebu. Sa Canada, ginreport man sang isa ka tsapter sang KM nga ginabug-os sang mga pamatan-on nga Pilipinong migrante kag diaspora ang paglunsar sang OP-OD.

Wala-tuo man ang pagpahayag sang mga tsapter sang KM agud saulogon ang anibersaryo sini. Ginsaluduhan nila si Ka Joma, ang tsirman sang pagkatukod sang KM, para sa baol sang manggad nga pagtulun-an nga ginbilin niya para sa mga pamatan-on sa pagpasulong sang rebolusyon Pilipino. Lakip sa mga nagpaguwa sang pahayag ang mga tsapter sini halin sa rehiyon sang Ilocos, Metro Manila, Negros Island, Panay, kag sa Laguna, Cavite kag Cebu.

“Sa aton paglubog sa masa, makahas naton nga pandayon ang aton panindugan. Ginapanawagan kita nga magbiya na sa aton komportable nga kabuhi kag naandan…mas may kahulugan ang sakripisyo para tapuson ang dunot nga sistema,” pahayag sang KM.