Israel ken US, nakedngan a nakabasol iti krimen ti henosidyo ken ekosidyo. Nagleppas ti International People’s Tribunal (IPT) on Palestine a naangay idi Nobyembre 22-23 idiay Spain iti husga a nakabasol ti Zionista nga estado ti Israel ken dagiti kasabwat daytoy a gubyerno ti US, UK, Germany, France ken dadduma pay a krimen a henosidyo ken ekosidyo.

Idi Nobyembre 29, nagtataripnong dagiti grupo a maka-Palestine iti panangiyuna ti Philippines-Palestine Friendship Association tapno talantanen ken pasingkedan ti husga ti IPT. Sinaruno daytoy ti ababa a tignay iti sango ti University of the Philippines-Manila nu sadinno a naangay ti taripnong.

2-aldaw a kalampagan ti katutubo a Cordilleran idiay NCR. Indeklara dagiti katutubo manipud idiay Cordillera a balligi ti 2-aldaw a kalampagan iti nailyan a kabisera nga insayangkat da idi Nobyembre 25 ken 26. Panggep ti kalampagan nga ipakaammo kadagiti ahensya ken departamento ti gubyerno, kasta met iti Konggreso, dagiti arungaing dagiti katutubo manipud iti rehiyon. Ti kalampagan ket inyuna ti Cordillera People’s Alliance.

Plano a demolisyon idiay Taytay, kinundenar. Nagprotesta iti sango ti munisipyo ti Taytay, Rizal dagiti residente kadagiti sityo ti Sapang Gody ken Siwang ti Barangay San Juan idi Nobyembre 26 tapno umawag ti dayalogo iti lokal a gubyerno ken kundenaren ti pangta a demolisyon iti lugar da. Pilit a kamkamkamen ti Sta. Lucia Corporation ken ni Kristina Robles ti nakaitakderan ti pagtaengan da.

Kabataan, sumupsupyat iti Davao Bus Project. Nagprotesta ti Anakbayan-SMR idi Nobyembre 24 idiay Davao City, tapno iyawag ti panangibasura iti peke a modernisasyon ken kontra-umili a Davao Bus Project (DBP) ti lokal a konseho ti Davao City. Ti proyekto ket ipilpilit ti Asian Development Bank, kasabwat ti pamilya Duterte iti syudad. Gagem ti proyekto a pukawen ti agan-andar a sistema ti transportasyon idiay Davao a bukbuklen dagiti moderno ken tradisyunal a dyip, traysikel ken bus. Ti DBP ket pondoan ti ₱54 bilyon nga utang manipud iti ADB.