Idiay Samar,manipud Nobyembre 22 ket militarisado dagiti barangay Gereganan, Marcos, San Miguel ken kadagiti kaabay a komunidad iti Gandara. Gapu ditoy, nasurok 100 residente ti barangay Marcos ken San Miguel ti kapilitan a pimmanaw kadagiti pagtaengan da. Nagiyatnag met ti hamlet ti militar ken linapdan da ti ipapan iti talon ken panagsapul iti pagbiagan.

Idiay Northern Samar, nagisayangkat ti aerial bombing ken panagistraping ti 8th ID idiay Barangay Nipa, Palapag idi Nobyembre 29 alas-2 ti parbangon. Nangitunda daytoy ti nakaro a buteng kadagiti residente.

Idiay Kalinga, awan sarday ti operasyon kombat ti 103rd IB kadagiti barangay idiay Pinukpuk kasaruno dagiti engkwentro daytoy iti hukbo ti umili idi Nobyembre 21. Agkamkampo dagiti soldado kadagiti sentro ti komunidad a makaap-apektar iti pagbiagan ken seguridad ti umili. Idi Nobyembre 30, hinalughog dagiti pulis ti balay ti salaknib ti karbengan-tao a ni Elma Awingan-Tuazon idiay Barangay Cawagayan, Pinukpuk. Dinarup ti 20 pulis ti balay na iti pammabasol a mangay-aywan ti nasugatan a mannakigubat ti NPA.

Iti sabali a paset ti pagilyan, nailista dagiti kaso ti panagaresto, panagpuor ken panaglipit ti militar. Idiay Navotas City, inaresto dagiti pulis ti kontra demolisyon a lider-kababaihan a ni Jane Alfabete idi Nobyembre 27.

Idiay Negros Occidental, pinuoran ti 15th IB ti balay ti mannalon a ni Carmelita Ulgasan idiay Barangay Linaon idi Nobyembre 28 iti pammabasol a sumupsuporta ti hukbo ti umili. Kabayatanna, agtultuloy ti panagliplipit ni Warden Jsupt. Crisyrel Awe kadagiti balud pulitikal ken dadduma a balud iti pagbaludan idiay Bago City. Nagprotesta dagiti balud ken pamilya da tapno labanan daytoy idi Disyembre 3.

Idiay Masbate, tinakaw ti 2nd IB ti walo a nuang ken baka dagiti mannalon iti Lupaing Triple A idiay Cawayan, Masbate idi Nobyembre 27. Sakbay daytoy, tinakaw met dagiti soldado ti taraken nga ayup dagiti mannalon kadagiti barangay iti ili ti Mobo, Milagros ken Uson.