Isip pagsaulog sa ika-61 nga anibersaryo sa Kabataang Makabayan (KM) niadtong Nobyembre 30, naglunsad og pagtuon, asembliya, rali, ug uban pang aktibidad ang mga balangay niini. Paningkamot usab kini sa KM aron palagsikon ang tago nga kalihukan sa han-ay sa mga kabatan-onan ug pakusgon ang ilang pagsalmot sa rebolusyonaryong kalihukan.

Nagpalig-on ang KM samtang nanguna ang mga kabatan-onang Pilipino sa malukpanong mga protesta batok sa korapsyon sa tibuok nasud sukad pa niadtong Setyembre. Giawhag sa KM ang mga kabatan-onan nga padayong pakusgon ang ilang singgit ug pagbatok sa korapsyon ug burukrata-kapitalismo. Dungan niini, gitin-aw nila nga ang tinuod nga kausaban makab-ot lamang sa mga kabatan-onan ug katawhan pinaagi sa gubat sa katawhan.

Tun-an ang gubat sa katawhan

Sa Maynila, usa ka balangay sa KM sa usa ka kolehiyo ang nagtapok aron hisgutan ang sinulat ni Ka Amado Guerrero nga Ang Mga Partikular nga Kinaiya sa Atong Gubat sa Katawhan. Gipili nila kini aron tun-an ang gubat sa katawhan nga gilunsad sa Bagong Hukbong Bayan (BHB), masabtan ang mga partikularidad niini, ug mahibal-an ang pamaagi sa pagpaasdang niini gikan sa usa ka yugto ngadto sa lain pa.

“Napalalum niini ang akong pagsabot sa gubat sa katawhan,” pagpaambit ni Ka Sharon, bag-ong rekrut sa KM. “Taliwala sa akong hut-ong gigikanan, mas excited ko karon nga moapil sa sunod nga grupo sa mga estudyante nga mo-integrate sa rebolusyon,” matud pa ni Ka Len.

Duyog usab nga nanan-aw ang mga sakop sa KM og dokumentaryo sa Sine Proletaryo nga Buhay Komunista 2, nagtuon og rebolusyonaryong kantang Pagbati, ug nagbasa og balak nga Ang Gerilya Ay Tulad Ng Makata ni Kaubang Jose Maria Sison. Gitun-an usab sa balangay ang mahitungod sa paghimo og rebolusyonaryong arte ug sa pagkapareho niini sa arte sa gerilyang pakiggubat.

Nagpadayag sa optimismo ang upisyal sa balangay nga si Ka Ces sa maayong ibunga sa ilang panagtigum. “Hinaot nga mahatagaan kita og kusog niining mga diskusyon aron mas mapanday pa nato ang atong kaugalingon sa ideolohiya,” matud pa niya. Labaw kining gikinahanglan sa mga myembro sa KM atubangan sa nagkagrabeng pulitikanhong sitwasyon ubos sa rehimeng Marcos.

Mga rali, asembliya, ug OP-OD sa KM

Taliwala sa pasistang pagpanumpo sa rehimen, mahukmanong nalunsad sa mga balangay sa KM ang mga rali, asembliya, ug operasyon pinta-operasyon dikit (OP-OD) sa pipila ka mga dapit. Maayo nilang giplano kini aron masiguro ang kaluwasan sa seguridad sa matag aktibidad.

Niadtong Nobyembre 27 ug 28, ug Disyembre 5, naglunsad og rali ang mga balangay sa KM sa Quezon City ug Maynila. Dala ang bandera sa KM, nanawagan sila sa mga kabatan-onan ug katawhang Pilipino nga mosalmot sa BHB ug ihalad ang kusog, kalantip, ug abilidad sa pagpaasdang sa gubat sa katawhan.

Sa Metro Manila, tulo ka asembliya sa KM ang napahigayon niadtong Nobyembre. Samtang, nakalunsad og OP-OD ang mga balangay sa KM sa De La Salle University (DLSU)-Manila, DLS-College of St. Benilde, University of the Philippines (UP)-Manila, ug Polytechnic University of the Philippines sa Maynila. Gikasa usab kini sa KM sa UP Los Baños sa Calamba City, Laguna, ug sa UP Cebu. Sa Canada, gireport usab sa usa ka balangay sa KM nga gilangkuban sa mga kabatan-onang migranteng Pilipino ug diaspora ang paglunsad og OP-OD.

Walag too usab ang pamahayag sa mga balangay sa KM alang sa pagsaulog sa anibersaryo niini. Gipasidunggan nila si Ka Joma, ang nangulo sa pagtukod sa KM, alang sa bahandianong mga leksyon nga iyang kabilin sa mga kabatan-onan sa pagpaasdang sa rebolusyong Pilipino. Lakip sa nagpagawas og pamahayag ang mga balangay niini gikan sa rehiyon sa Ilocos, Metro Manila, Negros Island, Panay, ug sa Laguna, Cavite, ug Cebu.

“Sa atong paglubog sa masa, mapangahas natong palig-onon ang atong baruganan. Giaghat kita nga mobiya na sa atong komportableng kinabuhi ug naandang kinaiya… labaw nga bililhon ang sakripisyo aron tapuson ang dunot nga sistema,” pamahayag sa KM.