Israel ngan US, ginsentensyahan nga salaan ha krimen han henosidyo ngan ecocide. Nahuman an International People’s Tribunal on Palestine nga ginhimo hadton Nobyembre 22-23 ha Spain ha sentensya nga mayda sala an Zionista nga estado han Israel ngan mga kakunsabo hini nga gubyerno han US, UK ngan Germany, France ngan iba pa ha henosidyo ngan ecocide nga krimen.

Hadton Nobyembre 29, nagkamayda hin katitirok an mga grupo nga maka-Palestine ha pangunguna han Philippines-Palestine Friendship Association agud talakayon ngan padig-unon an desisyon han IPT. Ginsundan ini han halipot nga paggios ha atubangan han University of the Philippines-Manila diin ginhimo an katitirok.

2 kaadlaw nga kalampagan han minoriya nga Cordilleran ha NCR. Igindeklara han mga minoriya tikang ha Cordillera nga madinaugon an 2 kaadlaw nga kalampagan ha nasyunal nga syudad nga iginlansar nira hadton Nobyembre 25 ngan 26. Katuyuanan han kalampagan an ipahibaro ha mga ahensya ngan departamento han gubyerno, sugad liwat ha Kongreso, an mga araba han mga minoriya tikang ha rehiyon. Ginpangunahan an kalampagan han Cordillera People’s Alliance.

Plano nga demolisyon ha Taytay, ginkundenar. Nagprotesta ha atubangan han munisipyo han Taytay, Rizal an mga residente han Sityo Sapang Gody ngan Siwang han Barangay San Juan hadton Nobyembre 26 agud manawagan hin dayalogo ha lokal nga gubyerno ngan kundenaron an hulga nga demolisyon ha ira lugar. Pirit nga gin-aangkon han Sta. Lucia Corporation ngan ni Kristina Robles an ira gin-uukyan.

Kabatan-unan, natipa ha Davao Bus Project. Nagprotesta an Anakbayan-SMR hadton Nobyembre 24 ha Davao City, agud ipanawagan an pagpapabasura ha peke nga modernisasyon ngan kontra-katawhan han Davao Bus Project (DBP) han lokal nga konseho han Davao City. Iginpipirit an proyekto han Asian Development Bank, kakunsabo an pamilya Duterte, ha syudad. Katuyuanan han proyekto nga lusawon an nadalagan nga sistema han transportasyon ha Davao nga ginbubug-os han mga moderno ngan tradisyunal nga dyip, traysikol ngan bus. Ginpopondohan an DBP han ₱54 kabilyon nga utang tikang ha ADB.