Israel kag US, ginpamatbatan nga may kasal-anan sa krimen sang henosidyo kag ecocide (pagwasak sang kapalibutan). Natapos ang International People’s Tribunal (IPT) on Palestine nga ginhiwat sadtong Nobyembre 22-23 sa Spain sa pamatbat nga may kasal-anan ang Zionistang estado sang Israel kag kakunsabo sini nga gobyerno sang US, UK, Germany, France kag iban pa sa krimen sang henosidyo kag ecocide.

Sadtong Nobyembre 29, may pagtipon ang mga grupo nga maka-Palestine sa pagpanguna sang Philippines-Palestine Friendship Association agud talakayon kag palig-unon ang pamatbat sang IPT. Ginsundan ini sang malip-ot nga hublag sa atubang sang University of the Philippines-Manila kon diin ginhiwat ang pagtililipon.

2 ka adlaw nga pagpagahod sang tumandok nga Cordilleran sa NCR. Gin-deklarar sang mga tumandok halin sa Cordillera ang madinalag-on nga 2-adlaw nga pagpagahod sa pungsodnon nga sentro nga ginlunsar nila sadtong Nobyembre 25 kag 26. Katuyuan sang pagpagahod ang ipaabot sa mga ahensya kag departamento sang gobyerno, subongman sa Kongreso, ang mga reklamo sang mga tumandok halin sa rehiyon. Ginpangunahan ang pagpagahod sang Cordillera People’s Alliance.

Plano nga demolisyon sa Taytay, ginkundenar. Nagprotesta sa atubang sang munisipyo sang Taytay, Rizal ang mga residente sang mga sityo nga Sapang Gody kag Siwang sang Barangay San Juan sadtong Nobyembre 26 agud manawagan sang dayalogo sa lokal nga gobyerno kag kundenaron ang peligro nga demolisyon sa ila lugar. Pilit nga gina-agaw sang Sta. Lucia Corporation kag ni Kristina Robles ang ginapatindugan sang ila balay.

Pamatan-on supak sa Davao Bus Project. Nagprotesta ang Anakbayan-SMR sadtong Nobyembre 24 sa Davao City, agud ipanawagan ang pagbasura sa peke nga modenisasyon kag kontra-pumuluyo nga Davao Bus Project (DBP) sang lokal nga konseho sang Davao City. Ginapilit ang proyekto sang Asian Development Bank, kakunsabo ang pamilya Duterte, sa syudad. Katuyuan sang proyekto nga lusawon ang nagagana nga sistema sang transportasyon sa Davao nga ginabug-os sang moderno kag tradisyunal nga dyip, traysikol kag bus. Pondohan ang DBP sang ₱54 bilyon nga utang halin sa ADB.