Utro nga nagmartsa ha kakalsadahan hadton Nobyembre 30 an yukut-yukot nga Pilipino ha dirudilain nga parte han nasud para magprotesta kontra ha nabubuksas nga hiluagan nga korapsyon ha gubyerno. Kadungan ini han pagsalin-urog ha ika-162 nga kaadlawan han amay han rebolusyon Pilipino nga hi Andres Bonifacio.

Hito nga adlaw, nag-aningal an mga panawagan han katawhan tikang ha pagpapabaton ha tanan nga dabi ha anomaliya, pagbungkag ha mga dinastiya ha pulitika, ngan pagpapabul-iw ha poder ha presidente nga hi Ferdinand Marcos Jr, bise presidente nga hi Sara Duterte, ngan iba pa nga korap nga upisyal.

Ha pangunguna han Kilusang Bayan Kontra Kurakot (KBKK), masobra 20,000 an nagtirok ha Luneta Park ha Manila para ha protesta nga Baha sa Luneta 2.0. Nag-atentar an rehimen Marcos nga igdiskaril an paggios ha pagdidiri ha ira nga makapagtirok ngan makapaglansar han programa. Waray mapugngan han pananabotahe an guliat han katawhan para ha baratunon ngan hustisya.

Tinambong ha paggios an magkalain-lain nga mga grupo, pwersa ngan sektor kaupod an mga trabahador, parag-uma, kablas ha syudad, estudyante, kababayin-an, ngan tawo ha singbahan. Sugad han una nga gindeklara han KBKK, abrido hini nga ginkarawat an magkalain-lain nga mga panawagan han mga grupo kalakip an pagpapabul-iw kanda Marcos ngan Duterte ngan pagtutukod han usa nga transition council.

Yukut-yukot liwat an nagtirok ha protesta nga Trillion Peso March 2.0 nga ginhimo ha EDSA ha Quezon City. Ginpangunahaan ini han Singahan Katoliko ngan iba pa nga mga grupo ngan partido nga nagkokomponer ha Trillion Peso March Movement (TPMM).

Antes an mga paggios, naningkamot kundi napakyas an KBKK nga makig-usa ha TPMM para ha usa gud la nga protesta ha Metro Manila. Waray pagtugot an mga grupo ha TPMM, partikular na an Akbayan, nga butaray nga dad-on han mga grupo nga nakapailarum ha KBKK an mga panawagan nga butaray nga nagduduon kan Marcos ha pagkakadabi ha sistemiko nga korapsyon.

Ha gawas han Metro Manila, ginios an mga grupo nga alyado han KBKK ha Baguio City, La Union, Ilocos Sur, Ilocos Norte, Isabela, Tarlac, Calamba City, Cavite, Oriental Mindoro, Legazpi City, Naga City, Antique, Capiz, Aklan, Iloilo City, Bacolod City, Cebu City, Tacloban City, Davao City, Cagayan de Oro City ngan ha General Santos City. Nahireport liwat an mga misa, katitirok ngan martsa han mga kapadian ngan lider han singbahan, kaupod an katawhan, ha diri mamenos ha 86 nga diyosesis ha bug-os nga nasud.

Ha gawas han Pilipinas, inabot ha haros 2,000 nga Pilipino nga migrante ngan mga alyado ha 30 nga syudad ha 23 nga nasud an pinartisipar ha pankalibutan nga paggios kontra korapsyon. Ginpangunahan an mga protesta han nabug-os pa la nga KBKK-Global.

Step down kontra step up

Mas linandaw an pagkakaiba han panawagan han mga grupo kasumpay han pagpapabaton kan Marcos mismo. Diniri an Akbayan, usa ha mga nangunguna ha TPMM, nga kilal-on an kagrabihon han korapsyon ni Marcos ngan lugod nanawagan pa ini nga mag-“step-up” hiya ha pag-ato ha korapsyon. Sukwahi gud ini ha panindugan han KBKK nga dako an baratunon ni Marcos ha sistemiko nga anomaliya ha gubyerno.

Nanawagan liwat an Akbayan kan Marcos nga himuon nga prayoridad an “anti-dynasty bill,” bisan kun an pamilya hini an pinakamaraut nga dinastiya ha pulitika.

“Step down” (lusad ka na) an panawagan han Bagong Alyansang Makabayan (Bayan, kaparte han KBKK) kan Marcos. Ini agud tagan-dalan an usa nga libre ngan tipatip nga imbestigasyon kontra ha korapsyon, ngan atubangon an baratunon ha iya mga krimen kontra ha katawhan Pilipino.

Kahuman han protesta han KBKK ha Luneta Park, ginpamunuan han Bayan an martsa tipakadto ha Mendiola agud sukton hi Marcos. Ginpanawagan han grupo an pagbubul-iw nira Marcos ngan Duterte. Panawagan nira nga saliwnan hira han usa nga national transition council. Sugad ha nakalabay, gin-ulang hira han yukut-yukot nga pulis ngan naduso na nga magprograma ha atubangan han University of the East ha Recto Avenue. Nakimartsa ha Bayan an mga pwersa han Partido Lakas ng Masa, Bukluran ng Manggagawang Pilipino ngan Sanlakas.

Ha paghuman han programa ha Recto Avenue, ginruba han mga raliyista an effigy ni Marcos nga may sul-ot nga korona ngan sash nga may nakapinta nga bandera han US.