Madinaugon nga iginlansar han National Democratic Front of the Philippines (NDFP) an ikalima nga internasyunal nga teoritikal nga kumperensya nga mayda tema nga Pasismo ha Ika-21 nga Siglo ha Pusod han mga Imperyalista nga Nasud. Ginhimo ini tikang Nobyembre 28 tubtub 29 ha Utrecht, The Netherlands.

Gintambungan an kumperensya han 125 nga indibidwal tikang ha 71 nga partido komunista ngan organisasyon masa. Baynte hini nga mga partido ngan grupo an nagsubmiter han mga kontribusyon nga gintalakay ha kumperensya. Iginhalad han NDFP an kumperensya ha hinumduman ni Ka Louie Jalandoni, proletaryo nga internayunalista ngan martir han rebolusyon Pilipino.

Naghisgot an 2 kaadlaw nga kumperensya ha teoretikal ngan istorikal nga pagsantop ha pasismo tikang ha mga sinurat nira Lenin, Stalin ngan Mao. Ginpadig-on hini an kahulugan han pasismo subay ha konsepto ni Georgi Dimitrov, usa nga komunista nga Bulgarian nga nagserbe nga pinuno han Communist International hadton dekada 1930. Sering ni Dimitrov, an makaklase nga kinaiya han pasismo aada ha porma han “dayag nga diktadura han pinakareaksyunaryo, pinakasobinista ngan pinaka-imperyalista nga elemento han kapitalismo ha pinansya.” Kinaiya han monopolyo kapitalismo nga ludlod ha krisis an pagin kontra-komunista, ultra-reaksyunaryo ngan pagin madarahug ha pagpuypoy ha klase nga trabahador.

Gintalakay ha kumperensya an utro nga pagbuylo han pasismo durot han pankalibutan nga krisis han sistema nga kapitalista, labina kataliwan han krisis ha pinansya hadton 2008-2009. Gintudlok nira an mga pangilal-an han pasismo ngan pasisasyon ha mga imperyalista nga nasud nga nakatutok ha masunod: 1) pasisasyon han burgis nga estado; 2) paggamit han AI (artificial intelligence) ngan abante nga teknolohiya agud pugngan ngan mas tiyupion an klase nga trabahador; 3) paggrabe han sobinismo ngan reaksyunaryo nga ideolohiya; ngan, 4) pag-ulpot han mga pasista nga kagiusan masa.

An pasisasyon han burgis nga estado an proseso diin nahuhukasan an liberal-burgis nga demokrasya ngan nabubutad an mas otoritaryan ngan mapanmuypoy nga mga pitad ngadto ha dayag nga paghahadi han teror.

Nagkamayda hin marayhak nga balyuay hiunong ha interaksyon han pasismo ha mga imperyalista nga nasud ngan ha mga neokolonya, diin batakan nga kinaiya han estado an pasismo. Ha mga bagakolonya syahan nga gin-aatentar ngan iginpapatuman han imperyalismo an mga eksperimento ha paggamit han terorismo han estado. Gin-gagamit hini an programa nga kontra-insurhensiya, panmilitar nga ayuda ngan manipulasyon ngan magdarahug nga panmuypoy ha mga katawhan.

Mayda partikular nga diskusyon ha nalalain nga eksperyensya han Ireland, nga ginkukunsidera an kalugaringon komo kapitalista nga bagakolonya, ngan Palestine, usa nga okupado nga nasud. Ha mga kagiusan nga pagtatalwas hini nga mga nasud, magkatig-ob an kontra-pasista ngan kontra-imperyalista nga pag-ato.

Gintudlok han kumperensya komo kadagmitan nga buruhaton han proletaryo an pagtutukod han “mapan-ato nga mga organisasyon” agud tugbangan an ginbug-os nga “mapan-ato nga mga organisasyon” han mga pasista nga kagiusan. Naghatag an mga kasama tikang ha mga imperyalista nga nasud han mga pananglitan han mga kongkreto nga kontra-pasista nga pag-ato.

Iginpresenta nira an mga leksyon tikang ha ira buruhaton masa, mga adbokasiya, pagdepensa ha kalugaringon ngan pag-oorganisa ha sakob han mga unyon, partido, organisasyon ngan kagiusan. Gindudun-an nira an panginahanglan han pagtutukod han hiluag nga kontra-pasista nga nagkakaurusa nga prente han mga trabahador ngan iba nga demokratiko nga sektor. Sering nira, an pagtutukod hini nga alyansa nangangahulugan han pagsalikway han sektaryanismo ngan konserbatismo, samtang mabinantayon ha mga sosyal demokrata ngan iba pa nga oportunista nga elemento. Maaram hira nga integral an pamumuno han proletaryo ha nagkakaurusa nga prente ha pagsusumpay han mga panmasa nga pakigbisog ha pagpara han gamot han pasisasyon. Yawe ini nga pamumuno ha pagbungkag ha monopolyo kapitalismo ngan diktadura han burgesya.

Kumbinsido an mga pinartisipar tikang ha mga imperyalista nga nasud nga kinahanglan tukuron an madig-on nga partido han mga trabahador. Kinahanglan ipatuman an mga operasyon nga nakatago, kakumbinar an mga buruaton ha dayag, agud mag-iha ha atubangan han mga pasista nga pangatake ngan kab-uton an mga kadaugan para ha klase nga trabahador. Kinahanglan liwat mas pahiluagon an mga pagkakaurusa ha mga pakigbisog ha pusod han mga imperyalista nga nasud ngan mga bagakolonya.

Naghuman an kumperensya ha usa nga halipot nga kultural nga programa nga may tema nga “Tikang ha Palestine tubtub Pilipinas, rub-on an pan-gerra nga makina han US,” kadungan han pagsalin-urog han International Day of Solidarity with the People of Palestine.