Ha Samar, tikang Nobyembre 22 militarisado an mga barangay han Gereganan, Marcos, San Miguel ngan kaamyaw nga mga komunidad ha Gandara. Bunga hini, masobra 100 nga residente han barangay Marcos ngan San Miguel an napiritan nga mag-ebakwet ha ira mga balay. Nag-imponer han hamlet an militar ngan ginpugngan an pagtukad ngan pagpakabuhi.

Ha Northern Samar, naglansar han aerial bombing ngan pangistraping an 8th ID ha Barangay Nipa, Palapag hadton alas-2 han kaagahon han Nobyembre 29. Nagdurot ini hin grabe nga kahadlok ha mga residente.

Ha Kalinga, waray hunong an pankombat nga operasyon han 103rd IB ha mga barangay ha Pinukpuk kasunod han mga engkwentro hini ha hukbo han katawhan hadton Nobyembre 21. Nagkakampo an mga sundalo ha mga sentro nga komunidad nga nakakaapekto ha panginabuhi ngan seguridad han katawhan. Hadton Nobyembre 30, ginransak han mga pulis an balay han tagdepensa han tawhanon nga katungod nga hi Elma Awingan-Tuazon ha Barangay Cawagayan, Pinukpuk. Gin-atake han 20 nga pulis an iya balay ha akusasyon nga nag-aataman han samaran nga mangaraway han BHB.

Ha iba nga parte han nasud, nahirekord an mga kaso han pangaresto, panunog, ngan pan-gigipit han militar. Ha Navotas City, gin-aresto han mga pulis an kontra-demolisyon nga lider-kababayin-an nga hi Jane Alfabete hadton Nobyembre 27.

Ha Negros Occidental, ginsunog han 15th IB an balay han parag-uma nga hi Carmelita Ulgasan ha Barangay Linaon hadton Nobyembre 28 ha akusasyon nga tagsuporta han hukbo han katawhan. Samtang, padayon an pan-gigipit ni Warden Jsupt. Crisyrel Awe ha mga priso pulitikal ngan iba pa nga priso ha prisuhan ha Bago City. Nagprotesta an mga priso ngan pamilya agud atuhan ini hadton Disyembre 3.

Ha Masbate, ginkawat han 2nd IB an walo nga karabaw ngan baka han mga parag-uma ha Lupaing Triple A ha Cawayan, Masbate hadton Nobyembre 27. Antes hini, ginkawat liwat han mga sundalo an inataman nga hayop han mga parag-uma ha barangay ha bungto han Mobo, Milagros ngan Uson.