Ha hukbo han katawhan, importante an pag-aaram agud maremolde an mga mangaraway komo mga proletaryo nga rebolusyunaryo.

Ha Luntian, usa nga yunit han BHB ha Southern Tagalog, ginseseguro han komite han Partido ha sakob hini nga naiisa an balitang hana teoritikal nga pagsantop ha Marxismo-Leninismo-Maoismo. Mahugot hini nga ginsusumpay an teorya ha kongkreto nga rebolusyunaryo nga praktika han yunit.

“An nagin ayat ha pagpapatuman han buruhaton edukasyon ha hukbo han katawhan an ginkakaatubang nga panmilitar nga sitwasyon,” sering ni Ka Reymundo, kumander han yunit. Haros usa katuig nga dirudiretso an maniobra han Luntian tungod ha ginpapintas nga mga operasyon han Armed Forces of the Philippines. Nagdamo an gindeploy nga mga tropa hini ha prente gerilya. Ginpapintas liwat an paggamit hini han moderno nga mga armas ngan teknolohiya.

Pagpaparayhak han pampartido nga edukasyon

Nakatutok an kampanya nga edukasyon han Luntian ha utro nga pag-aram ha kasaysayan ngan mga batakan nga pag-analisar ngan linya han Partido. Pagsunod ini ha praktikal nga giya ha gintalaan han Partido nga kagiusan pagtutul-id. Tikang 2024, iginlansar ha yunit an regular ngan ispesyal nga mga kurso para rebyuhon an mga kasaypanan ngan kaluyahan, ngan pauswagon an mga kasama komo mga komunista. Kalakip ha mga kurso an Burukratismo, Kumandismo ngan Liberalismo, Igtul-id an mga Kasaypanan ngan Utro nga Tukuron an Partido, Komunista, Magin Abante nga Elemento han Proletaryado, Batakan Balaud han Partido ngan Programa para ha Demokratiko nga Rebolusyon han Katawhan.

Ginduduyugan an mga pag-aram han programa nga Kolektibo nga Pagbasa ngan Kolektibo nga Talakayan (KBKT) han mga aradman nga dokumento. Ini para mapamilyarisa an mga estudyante ha gin-uunod han mga kurso. Naaghat hini an mga kasama nga hadto waray hilig ha pagbabasa o talakayan. Kun nahilikatan, mismo an mga mangaraway an nagpapakiana: “Waray ba kita KBKT?”

Nagin inadlaw nga aktibidad liwat an Rebokabularyo. Iginpapakilala ngan iginpapaliwanag hini nga aktibidad an magbug-at nga termino, balaud, ngan signipikante nga personahe nga aada ha mga aradman nga topiko kada adlaw.

Kada nga naabot, agap nga gintatalakay an mga mensahe han Komite Sentral ngan Komite han Rehiyon ha mga anibersaryo han Partido ngan Hukbo. Gintatambungan ini han mga kadre ngan kaapi han Partido ha magkalain-lain nga lebel, ngan hasta han rebolusyunaryo nga masa.

Napuntirya ha mga kaluyahan

Mahugot nga iginsusumpay ha kongkreto nga rebolusyunaryo nga praktika han mga kasama an mga pag-aram. Ginkukuha an mga pananglitan tikang ha aktwal nga eksperyensya han yunit ngan praktika han mga kasama.

Tungod dinhi, nagigin aragianan an mga pag-aram han unipikasyon han mga pag-ases ngan pagsusuma ha mga karukayaknon nga ginkakaatubang han yunit.

Naaaghat an mga kasama nga balikan an mga kalugaringon nga rebolusyunaryo nga praktika ha panahon han mga pag-aram ngan gamiton ini nga giya ha pagsusuma ha kalugaringon. Ha panahon han mga diskusyon, mas magaan nga nahiaatubang ha mga kasama an mga kasaypanan ngan kaluyahan han mga indibidwal.

“Damo kabeses nga naiigo ako ha pag-aram, ha mga angay himuon, ngan kun ano gud an karuyag sidngon han hul-os ngan bug-os nga pagseserbe,” sigon ha usa nga estudyante ha pag-ases han pag-aram nga naghisgot ha mga pamaagi tipaunan-o magpakaupay komo proletaryado.

Pag-ato ha empirisismo

An pag-iisa han praktika ha teoritiko nga balitang han mga kasama yawe ha pag-ato ha empirisismo. Giya ini ha mga pag-ases ngan pagsusuma. Katuyuanan hini nga magresulta han mas hitaas nga rebolusyunaryo nga praktika.

Ha mga pag-aram, gin-aaghat an mga kasama nga magin mas kritikal ha kalugaringon ngan ha iba nga kasama hiunong ha mga sayop nga estilo han pagtrabaho. Dako an bulig hini ha pag-ato han damo nga indibidwal ngan kolektibo nga kaluyahan han yunit. Yawe liwat ini ha pagresolba han mga sumpakiay nga nagtitikang ha magkalain-lain nga ideya, praktika ngan estilo.

“Mayda mga sumpakiay ha pagtutudlok han tama ngan sayop ha praktika, pag-eksister han empirisismo ngan indibidwalismo, nga dirudiretso nga gin-aatuhan han yunit,” sigon kan Ka Reymundo. Ha pagkita niya, mayda pag-uswag na hini ngs mga sumpakiay. Hinay-hinay na nga nagbabag-o an mga sayop nga kabatasanan ngan praktika han mga kasama.

“Mas mahugot na an yunit ha pagpapatuman han mga ginkaurusahan,” sering niya.