Madinalag-on nga ginhiwat sang National Democratic Front of the Philippines (NDFP) ang ikalima nga internasyunal nga teoritikal nga kumperensya nga may tema nga Pasismo sa Ika-21 Siglo sa Pusod sang mga Pungsod Imperyalista. Ginpatigayon ini halin Nobyembre 28 tubtob 29 sa Utrecht, The Netherlands.

Gintambungan ang kumperensya sang 125 ka indibidwal halin sa 71 ka partido komunista kag organisasyon masa. Duha ka napulo sa mga partido kag grupo nga ini ang nagpasa sang mga kontribusyon nga gintalakay sa kumperensya. Ginhalad sang NDFP ang kumperensya sa handurawan ni Ka Louie Jalandoni, proletaryong internasyunalista kag martir sang rebolusyon Pilipino.

Naglab-ot ang 2-adlaw nga kumperensya sa teoritikal kag istorikal nga paghangup sa pasismo halin sa mga sinulatan nanday Lenin, Stalin kag Mao. Ginpalig-on sini ang kahulugan sang pasismo santo sa konsepto ni Georgi Dimitrov, isa ka komunistang Bulgarian nga nagserbe nga pinuno sang Communist International sadtong dekada 1930. Siling ni Dimitrov, ang makasahi nga kinaiya sang pasismo yara sa dagway sang “hayag nga diktadurya sang pinaka-reaksyonaryo, pinaka-sobinista kag pinaka-imperyalista nga elemento sang kapitalismo sa pinansya.” Kinaiya sang monopolyo kapitalismo nga lubong sa krisis ang pagka-kontra-komunista, ultra-reaksyonaryo, kag pagkapintas sa pagsumpo sa sahing mamumugon.

Gintalakay sa kumperensya ang liwat pagbwelo sang pasismo dulot sang krisis sang pangkalibutanon nga kapitalistang sistema, ilabi na pagkatapos sang krisis sa pinansya sadtong 2008-2009. Gintumod nila ang mga manipestasyon sang pasismo kag pasisasyon sa mga imperyalistang pungsod nga nakatutok sa mga masunod: 1) pasisasyon sang burgis nga estado; 2) paggamit sang AI (artificial intelligence) kag abanse nga teknolohiya para sumpuon kag labi nga himuslan ang sahing mamumugon; 3) pagsingki sang sobinismo kag reaksyonaryong mga ideolohiya; kag, 4) pag-usbong sang mga pasista nga kahublagan masa.

Ang pasisasyon sang burgis nga estado ang proseso kon diin nagakahublasan ang burgis nga liberal nga demokrasya kag nagakabuyagyag ang mas otoritaryan kag mapanumpo nga mga tikang padulong sa hayag nga paghari sang teror.

May mapagsik nga bayluhanay bahin sa inter-aksyon sang pasismo sa mga imperyalistang pungsod kag sa mga neokolonya, kon diin sandigan nga kinaiya sang estado ang pasismo. Sa mga malakolonya una nga gintilawan kag ginpatuman sang imperyalismo ang mga ekspermento sa paggamit sang terorismo sang estado. Ginagamit sini ang programa nga kontra-insurhensya, ayuda militar kag manipulasyon kag mga mapintas nga pagpangsumpo sa mga pumuluyo.

May partikular nga talakayan sa pinasahi nga inagihan sang Ireland, nga nagakabig sang kaugalingon bilang kapitalistang malakolonya, kag Palestine, isa ka okupado nga pungsod. Sa mga kahublagan sa paghilway sa mga pungsod nga ini, naga-isa ang kontra-pasista kag kontra-imperyalista nga pakig-away.

Gintumod sang kumperensya bilang gilayon nga katungdanan sang proletaryo ang pagtukod sang “mapang-away nga mga organisasyon” agud tapatan ang gintukod nga “mapang-away nga mga organisasyon” sang mga pasistang kahublagan. Naghatag ang mga kaupod halin sa mga imperyalistang pungsod sang mga halimbawa sang mga kongkreto nga konta-pasista nga pakig-away.

Ginhapag nila ang mga leksyon halin sa ila hilikuton masa, mga adbokasiya, pagdepensa sa kaugalingon kag pag-organisa sa sulod sang mga unyon, partido, organisasyon kag kahublagan. Gindun-an nila ang kakinahanglanon sang pagtukod sang malapad nga kontra-pasista nga nagahiliugyon nga prente sang mga mamumugon kag iban nga demokratikong sektor. Siling nila, ang pagtukod sang alyansa nga ini nagakahulugan sang pagsikway sang sektaryanismo kag konserbatismo, samtang mabinantayon sa mga sosyal demokrata kag iban pa nga oportunistang elemento. Kahibalo sila nga integral ang pagpamuno sang proletaryo sa nagahiliugyon nga prente agud i-angot ang mga paghimakas masa sa pagdula sang ugat sang pasisasyon. Yabe ang pagpamuno nga ini sa pagbungkag sa monopolyo kapitalismo kag diktadurya sang burgesya.

Kumbinsido ang mga nagtambong halin sa mga imperyalistang pungsod nga kinahanglan nga itukod ang malig-on nga partido sang mga mamumugon. Kinahanglan nga ipatuman ang mga operasyon nga sekreto, kakumbina ang mga hilikuton hayag, para makapadugay sa atubang sang mga pasista nga atake kag lab-uton ang kadalag-an para sa sahing mamumugon. Kinahanglan man nga labi nga palaparon ang paghiliusa sa mga paghimakas sa pusod sang mga pungsod imperyalista kag mga mala-kolonya.

Nagtapos ang kumperensya sa isa ka malip-ot nga kultural nga programa nga may tema nga “Halin sa Palestine tubtob Pilipinas, tapuson ang makina pang-gyera sang US,” kadungan sa pagdumdom sa International Day of Solidarity with the People of Palestine (Pangkalibutanon nga Adlaw sang Pakig-isa sa Pumuluyong Palestino).