Liwat nagmartsa sa kadalanan sadtong Nobyembre 30 ang linibo ka Pilipino sa lain-lain nga bahin sang pungsod agud magprotesta batuk sa nagakabuyagyag nga lapnagon nga korapsyon sa gobyerno. Kadungan ini sa pagdumdom sa ika-162 nga kaadlawan sang amay sang rebolusyon Pilipino nga si Andres Bonifacio.

Sa adlaw nga ini, naglanog ang mga panawagan sang pumuluyo nga pasabton ang tanan nga imbolbado sa korapsyon, pagbungkag sa mga dinastiya sa pulitika, kag pagpahalin sa poder sa presidente nga si Ferdinand Marcos Jr, bise presidente nga si Sara Duterte, kag iban pa nga mga korap nga opisyal.

Sa pagpanguna sang Kilusang Bayan Kontra Kurakot (KBKK), masobra 20,000 ang nagtipon sa Luneta Park sa Manila para sa protestang Baha sa Luna 2.0. Gintilawan sang rehimen Marcos nga idiskaril ang hublag sa pagdumili sa ila nga makatipon kag makalunsar sang programa. Wala napunggan sang pagpangsabotahe ang singgit sang pumuluyo para sa pagpasabat kag hustisya.

Nagtambong sa hublag ang lain-lain nga mga grupo, pwersa kag sektor lakip ang mga mamumugon, mangunguma, imol sa syudad, estudyante, kababaehan, kag tawong simbahan. Kaangay sang nauna nga gindeklarar sang KBKK, bukas sini nga ginbaton ang lain-lain nga panawagan sang mga grupo lakip ang pagpahalin kanday Marcos kag Dutere kag pagtukod sang isa ka transition council.

Linibo man ang nagtipon sa protesta nga Trillion Peso March 2.0 nga ginhiwat sa EDSA sa Quezon City. Ginpangunahan ini sang Simbahan Katoliko kag iban pa nga mga grupo kag partido nga nagabug-os sang Trillion Peso March Movement (TPMM).

Antes ang mga hublag, gintinguhaan apang napaslawan ang KBKK nga maghiusa sa TPMM para sa isa ka protesta sa Metro Manila. Indi magpasugot ang mga grupo sa TPMM, partikular na ang Akbayan, nga hayagan nga dal-on sang mga grupo nga napaidalum sa KBKK ang mga panawagan nga lubos nga nagatum-ok kay Marcos sa pagka-imbolbar sa sistemang korapsyon.

Sa guwa sang Metro Manila, nag-hublag man ang mga grupo nga alyado sang KBKK sa Baguio City, La Union, Ilocos Sur, Ilocos Norte, Isabela, Tarlac, Calamba City, Cavite, Oriental Mindoro, Legazpi City, Naga City, Antique, Capiz, Aklan, Iloilo City, Bacolod City, Cebu City, Tacloban City, Davao City, Cagayan de Oro City kag sa General Santos City. Nareport man ang mga misa, pagtipon kag martsa sang mga kaparian kag lider sang simbahan, kaupod ang pumuluyo, sa indi magnubo sa 86 ka diyosesis sa bug-os nga pungsod.

Sa guwa sang Pilipinas, naglab-ot sa halos 2,000 ka Pilipinong migrante kag mga alyado sa 30 ka syudad sa 23 ka pungsod ang nagpakigbahin sa pangkalibutan nga hublag kontra korapsyon. Ginpangunahan ang mga protesta sang bag-o lang natukod nga KBKK-Global.

Step down kontra step up

Labi nga nakihad ang kinalain sang panawagan sang mga grupo kaangot sa pagpasabat kay Marcos mismo. Nagpamalibad ang Akbayan,isa sa mga nagapanguna sa TPMM, nga kilalahon ang kagrabehon sang korapsyon ni Marcos kag imbes nagpanawagan ini nga mag-“step-up” siya sa pakig-away sa korapsyon. Grabe ka taliw-as ini sa panindugan sang KBKK nga dako ang salabton ni Marcos sa sistemang korapsyon sa gobyerno.

Nagapanawagan man ang Akbayan kay Marcos nga himuon nga prayoridad ang “anti-dynasty bill,” bisan pa ang pamilya sini ang pinaka-bangkarote nga dinastiya sa pulitika.

“Step down” (magpanaog ka na) ang panawagan sang Bagong Alyansang Makabayan (Bayan, kabahin sang KBKK) kay Marcos. Ini para mahatagan sang dalan ang isa ka hilway kag maid-id nga imbestigasyon batuk sa korapsyon, kag atubangon ang salabton sa iya mga krimen batuk sa pumuluyong Pilipino.

Pagkatapos sang protesta sang KBKK sa Luneta Park, ginpamunuan sang Bayan ang martsa padulong sa Mendiola agud sukton si Marcos. Ginpanawagan sang grupo ang pagpahalin kay Marcos kag Duterte. Panawagan nila nga buslan sila sang isa ka national transition council. Kaangay sang nagligad, ginpunggan sila sang linibo ka pulis kag natulod nga magprograma sa atubang sang University of the East sa Recto Avenue. Nag-upod man sa martsa sang Bayan ang Partido Lakas ng Masa, Bukluran ng Manggagawang Pilipino kag Sanlakas.

Sa pagtapos sang programa sa Recto Avenue, ginwasak sang mga raliyista ang effigy ni Marcos nga nagasuksok sang korona kag sash nga may nakapinta nga bandera sang US.