Sa Samar, sugod Nobyembre 22 militarisado ang mga barangay Gereganan, Marcos, San Miguel kag kaiping nga mga komunidad sa Gandara. Tungod sini, masobra 100 ka residente sang barangay Marcos kag San Miguel ang napwersa nga magbiya sa ila mga balay. Nagpatuman man sang hamlet ang militar kag ginpunggan ang pagkadto sa bukid kag pagtrabaho.

Sa Northern Samar, naglunsar sang aerial bombing kag pag-istraping ang 8th ID sa Barangay Nipa, Palapag sadtong alas-2 sang kaagahon sang Nobyembre 29. Nagtuga ini sang grabe nga kahadlok sa mga residente.

Sa Kalinga, wala untat ang operasyon kombat sang 103rd IB sa mga barangay sang Pinukpuk sunod sang mga engkwentro sini sa hukbo sang banwa sadtong Nobyembre 21. Nagakampo ang mga soldado sa mga sentro sang komunidad nga naka-apekto sa palangabuhian kag seguridad sang pumuluyo. Sadtong Nobyembre 30, gin-abukay sang mga pulis ang balay sang tagpangapin sang tawhanon nga kinamatarung nga si Elma Awingan-Tuazon sa Barangay Cawagayan, Pinukpuk. Ginsulong sang 20 ka pulis ang iya balay sa pasibangod nga nagatago sang pilason nga hangaway sang BHB.

Sa iban nga bahin sang pungsod, nalista ang mga kaso sang pag-aresto, pagpangsunog kag pagpang-ipit sang militar. Sa Navotas City, gin-aresto sang mga pulis ang kontra-demolisyon nga lider-kababaehan nga si Jane Alfabete sadtong Nobyembre 27.

Sa Negros Occidental, ginsunog sang 15th IB ang balay sang mangunguma nga si Carmelita Ulgasan sa Barangay Linaon sadtong Nobyembre 28 sa pasibangod nga tagasuporta sang hukbo sang banwa. Samtang, padayon ang pagpang-ipit sang Warden Jsupt. Crisyrel Awe sa mga bilanggong pulitikal kag iban pa nga priso sa bilangguan sa Bago City. Nagprotesta ang mga bilanggo kag pamilya agud pamatukan ini sadtong Disyembre 3.

Sa Masbate, ginkawat sang 2nd IB ang walo ka karabaw kag baka sang mga mangunguma sa Lupaing Triple A sa Cawayan, Masbate sadtong Nobyembre 27. Antes sini, ginkawat man sang mga soldado ang ginasagod nga mga kasapatan sang mga mangunguma sa mga barangay sa banwa sang Mobo, Milagros kag Uson.