Sa hukbo sang banwa, malahalon ang pagtuon agud mahorma ang mga hangaway bilang mga proletaryong rebolusyonaryo.

Sa Luntian, isa ka yunit sang BHB sa Southern Tagalog, ginapaseguro sang Partido sa sulod sini nga mapasaka ang lebel sang teoritikal nga paghakos sang Marxismo-Leninismo-Maoismo. Hugot sini nga ginaangot ang teorya sa kongkreto nga rebolusyonaryong praktika sang yunit.

“Ang nangin hangkat sa pagpatuman sang hilikuton edukasyon sa hukbo sang banwa amo ang kahimtangan sa sitwasyon militar,” siling ni Ka Reymundo, kumander sang yunit. Halos isa ka tuig nga tayuyon ang maniobra sang Luntian tungod sa ginpasingki nga mga operasyon sang Armed Forces of the Philippines. Nagdamo ang ginpakat nga mga tropa sini sa larangan gerilya. Ginpasingki man ang paggamit sini sang moderno nga mga armas kag teknolohiya.

Pagpapagsik sang edukasyon pangpartido

Nakatutok ang kampanyang edukasyon sang Luntian sa pagbalik-tuon sa kasaysayan kag mga sandigan nga pag-analisa kag linya sang Partido. Pagsunod ini sa praktikal nga ubay nga gintalana sang Partido sa kahublagan panadlong. Halin 2024, ginlunsar sa yunit ang regular kag ispesyal nga mga kurso para balik-tun-an ang mga kasaypanan kag kahuyangan, kag hormahon ang mga kaupod bilang mga komunista. Lakip sa mga kurso ang Burukratismo, Kumandismo kag Liberalismo, Tadlungon ang mga Kasaypanan kag Liwat Tukuron ang Partido, Komunista, Mangin Abanse nga Elemento sang Proletaryado, Sandigan nga Konstitusyon sang Partido kag Programa para sa Demokratikong Rebolusyon sang Banwa.

Gina-updan ang mga pagtuon sang programa sang Kolektibong Basa kag Kolektibong Talakayan (KBKT) sang mga ginatun-an nga mga dokumento. Ini agud mapamilyarisa ang mga tumuluon sa kaundan sang mga kurso. Gina-engganyo sini ang mga kaupod nga sadto wala sang hilig nga magbasa ukon magtalakayan. Kon malipatan, mismo ang mga hangaway ang mamangkot: “Wala bala kita sang KBKT?”

Nangin matag-adlaw nga aktibidad man ang Rebokabularyo. Ginapakilala kag ginapahangup sa aktibidad nga ini ang mga mabug-at nga termino, layi, kag signipikante nga personahe nga yara sa mga ginatun-an nga topiko kada adlaw.

Kon mag-abot, gilayon nga ginatalakay ang mga mensahe sang Komite Sentral kag Komiteng Rehiyon sa mga anibersaryo sang Partido kag Hukbo. Ginatambungan ang mga ini sang mga kadre kag katapo sang Partido sa lain-lain nga lebel, kag pati rebolusyonaryong masa.

Nagapana sa mga kahuyangan

Hugot nga ginaangot sa kongkretong rebolusyonaryong praktika sang mga kaupod ang mga pagtuon. Ginakuha ang mga halimbawa sa aktwal nga inagihan sang yunit kag praktika sang mga kaupod.

Tungod diri, nangin alagyan ang mga pagtuon sang unipikasyon sang mga pagtasa kag pagsuma sa mga hambalanon nga ginaatubang sang yunit.

Nagakaengganyo ang mga kaupod nga balikan ang kaugalingon nga rebolusyonaryong praktika sa panahon sang mga pagtuon kag gamiton ini nga ubay sa pagsuma sa kaugalingon. Sa panahon sang mga talakayan, mas mamag-an na nga maplastar sa mga kaupod ang mga kasaypanan kag kahuyangan sang indibidwal.

“Madamo nga beses ako nga naigo sa pagtuon, sa mga dapat himuon, kag kon ano gid ang buot silingon sang bug-os taguipusoon nga pag-alagad,” suno sa isa ka estudyante sa pag-ebalwar sang pagtuon nga may topiko sang pamaagi kon paano magpakamaayo bilang proletaryado.

Pagpangibabaw sa empirisismo

Ang pagpasaka sang praktika sa teoritiko nga lebel sang mga kaupod yabe sa pagpangibabaw sa emprisismo. Ubay ini sa mga pagtasa kag pagsuma. Katuyuan sini nga gikanan sang mas mataas nga rebolusyonaryong praktika.

Sa mga pagtuon, gina-engganyo ang mga kaupod nga mangin mas kritikal sa kaugalingon kag sa iban nga mga kaupod tuhoy sa mga sayup nga estilo sang pagtrabaho. Dako ang bulig sang mga ini sa pagpangibabaw sang madamo nga indibidwal kag kolektibo nga kahuyangan sang yunit. Yabe man ang mga ini sa pagresolbar sang mga banggi-anay nga naghalin sa magkatuhay nga ideya, praktika kag estilo.

“May mga banggi-anay sa pagtumod sang husto kag sayup sa praktika, pagluntad sang empirisismo kag indibidwalismo, nga tayuyon nga ginapangibabawn sang yunit,” suno kay Ka Reymundo. Sa akon pagtan-aw, may pag-uswag na sa mga banggi-anay nga ini. Amat-amat na nga nagabag-o ang mga sayup nga gawi kag praktika sang mga kaupod.

“Mas estrikto na ang yunit sa pagpatuman sa mga nahiusahan,” suno sa iya.