Sa hukbong bayan, mahinungdanon ang pagtuon aron maumol ang mga manggugubat isip mga proletaryong rebolusyonaryo.

Sa Luntian, usa ka yunit sa BHB sa Southern Tagalog, gisiguro sa komite sa Partido sulod niini nga mapataas ang lebel sa teoretikal nga pagsabot sa Marxismo-Leninismo-Maoismo. Higpit kining gisumpay sa kongkretong rebolusyonaryong praktika sa yunit.

“Ang nahimong hagit sa pagpatuman sa gimbuhatong edukasyon sa hukbong bayan mao ang ginaatubang nga sitwasyong militar,” matud ni Ka Reymundo, kumander sa yunit. Halos usa ka tuig nga walay hunong ang maniobra sa Luntian tungod sa gipakusog nga operasyon sa Armed Forces of the Philippines. Midaghan ang gideploy nga tropa niini sa natarang gerilya. Gipasubsub usab ang paggamit niini og modernong armas ug teknolohiya.

Pagpalagsik sa edukasyong pangpartido

Nakapokus ang kampanya sa edukasyon sa Luntian sa pagbalik-tuon sa kasaysayan ug batakang pagtuki ug linya sa Partido. Pagsunod kini sa praktikal nga giya sa kalihukang pagtul-id nga gitakda sa Partido. Sukad 2024, gilunsad sa yunit ang regular ug espesyal nga mga kurso aron tun-an balik ang kasaypanan ug kahuyangan, ug palambuon ang mga kauban isip mga komunista. Lakip sa mga kurso ang Burukratismo, Kumandismo ug Liberalismo, Tul-iron ang mga Kasaypanan ug Subling Tukuron ang Partido, Komunista, Maging Abanteng Elemento ng Proletaryado, Batakang Balaod sa Partido ug Programa alang sa Demokratikong Rebolusyon sa Katawhan.

Dungan sa mga pagtuon ang programang Kolektibong Basa ug Kolektibong Talakayan (KBKT) sa mga dokumento. Kini aron mahimong pamilyar ang mga estudyante sa mga kurso. Naaghat niini ang mga kauban nga kaniadto walay ganang mobasa o mosalmot sa diskusyon. Kung makalimtan, ang mga manggugubat na mismo ang mangutana: “Wala bay KBKT karon?”

Nahimong aktibidad usab ang Rebokabularyo sa matag adlaw. Gipaila ug gipatin-aw niini ang mabug-at nga mga termino, balaod, ug importanteng tawo nga anaa sa mga leksyon matag adlaw.

Matag moabot ang mensahe sa Komite Sentral ug Komiteng Rehiyon sa mga anibersaryo sa Partido ug Hukbo, ginahisgutan kini dayon. Gisalmutan kini sa mga kadre ug myembro sa Partido sa lain-laing lebel, ug bisan sa rebolusyonaryong masa.

Pagpunting sa mga kahuyangan

Hugot nga ginasumpay sa kongkretong rebolusyonaryong praktika sa mga kauban ang mga pagtuon. Ginakuha ang mga pananglitan gikan sa aktwal nga kasinatian sa yunit ug praktika sa mga kauban.

Tungod niini, nahimong pamaagi sa pagtuon sa paghiusa sa mga pag-ases ug pag-sumada sa mga isyu nga giatubang sa yunit.

Naaghat ang mga kauban nga balikan ang kaugalingong rebolusyonaryong praktika sa panahon sa pagtuon ug gamiton kini isip giya sa pag-sumada sa kaugalingon. Sa panahon sa diskusyon, mas hanoy nga napakita sa mga kauban ang mga sayop ug kahuyangan sa indibidwal.

“Daghang beses ko nga naigo sa pagtuon, sa unsay angay buhaton, ug unsa gyud ang kahulugan sa tibuok-kasingkasing nga pag-alagad,” matud sa usa ka estudyante sa pag-ases sa pagtuon nga nakapokus sa mga pamaagi unsaon pagpakamaayo isip proletaryado.

Pasalikway sa empirisismo

Ang pagpataas sa praktika ngadto sa teoretikanhong ang-ang sa mga kauban mao ang yawe sa pagbatok sa empirisismo. Giya kini sa mga pagtuki ug pagsumada. Tumong niining magbunga og mas taas nga rebolusyonaryong praktika.

Sa mga pagtuon, gidasig ang mga kauban nga mahimong mas kritikal sa kaugalingon ug sa uban mahitungod sa sayop nga estilo sa pagtrabaho. Daku ang tabang niini sa pagbatok sa daghan nga indibidwal ug kolektibong kahuyangan sa yunit. Yawe usab kini sa pagsulbad sa mga panagbangi nga naggikan sa lain-laing ideya, praktika, ug estilo.

“Adunay mga panagbangi sa pag-ila kun unsay husto ug sayop sa praktika, pagdomina sa empirisismo ug indibidwalismo, nga padayong gibatukan sa yunit,” matud ni Ka Reymundo. Sa iyang lantaw, aduna nay pag-uswag niini nga mga panagbangi. Hinay-hinay na nga nagbag-o ang mga sayop nga batasan ug praktika sa mga kauban.

“Mas hugot na ang yunit sa pagpatuman sa mga nahiusahan,” matud pa niya.